7sngi ai por U DC, ban weng ia ki tiar ha rud surok

Nongstoiñ, 29 Lber:
Tang namar ka jingbuh pathar jong ki briew ia ki mar ki mata ba pyndonkam, ban shna ia ki jingtei ki jong ki hapoh jong ka surok PWD jong ka sor Nongstoin, u Deputy Commissioner jong ka West Khasi Hills District, u Arun Kumar Kembhavi IAS, u la ai por 7 sngi ba ki dei ban weng noh.
Na ka liang jong u DC u la ong ruh ba ka jingbuh pathar jong ki briew ia ki mar kum u shyiap, u maw bad kiwei kiwei ki tiar shna ia ki jingtei kiba heh ki jong ki hapoh jong ka surok PWD da ki bun bun bnai, ka la wanrah ruh ia ka jingthut ha ka iaid ka ieng jong ki paidbah bad khamtam kala pynlong ruh ia ka jingdheng kali hapoh jong ka sor Nongstoin.
Kumta na ka liang jong u DC u la kyntu ia kiba kum kitei ki briew ba ki dei ban pynkynriah noh ia ki mar ki mata ki jong ki ba kila buh hapoh jong ka surok PWD ha sor Nongstoin, hapoh ka 7 sngi bad lada lap ia kiba dang pynkhein kin shah kurup noh ia ki mar ki jong ki bad yn ujor ruh da ka ehajar halor ka jingpynthut ia ki paidbah bad yn shah pynngat ruh ha ki kyndon ain hapoh jong ka IPC.