7ngut ki MLA, ka NPP, ki iakynduh ia U Himanta Sarma; kin pyniasoh BJP

Shillong: U Atanu Bhuyan, uwei na ki nongthoh khubor jong ka Assam, u thoh ha ka twitter jongu, ha ka 30tarik Naiwieng 2022, ba ki don 7ngut ki MLA jong ka seng NPP na Meghalaya, kiba la iakynduh ia U Himanta Biswa Sarma, myntri rangbah ka Assam, ha katei ka sngi bad u ong ruh, ba kitei kin sa pyniasoh shen sha ka seng BJP.

Ha kawei pat ka jingthoh jongu, u iathuh ba 3-4 ngut na kitei ki MLA, kin iasoh noh shen sha ka seng BJP. Ym shym la iathuh satia, la kitei ki MLA, ki dei kiba na Khasi, Jaintia Hills ne ki dei kiba na Garo hills.

Lada ka iaid katei ka jingkhein, ka paw shai, ba ki MLA, ki ban pyniasoh ialade sha ka seng BJP, kin don kumba 10ngut eiei, nalor kitei ki 3ngut kiba la dep iehnoh ia ka shuki MLA jongki bad kiba la dep pynbna,ba kin pyn iasoh shen bad ka seng BJP bad kitei ki kynthup ia u Bah Himalaya Shangpliang, MLA ka Mawsynram, ka Ferlin CA Sangma na Selsella bad sa U Benedic Marak, MLA ka Raksamgre.