75 percent poi ki nongthep vote ha baroh ka rilum Garo

Shillong, 16 Jymmang:
Ka jingthep vote ka elekshon MP shiteng samoi na ka bynta ka Tura Lok Sabha konstitwensi ka la iaid beit khlem kano kano ka jingjia, kaba la poi haduh 75 percent ki nongwan thep vote naduh 7 baje mynstep haduh 5 baje janmiet ha baroh kawei ka rilum Garo.
Ha kane ka kynti, ka jingiakhun ka long beit para marwei hapdeng u khun jong u MP barim u P A Sangma, u Conrad K Sangma na ka NPP bad ka lok jong u Myntri Rangbah u Mukul Sangma ka Dikkanchi Shira na ka Congress.
Hapdeng ka jingdum ka mariang, ki nongthep ki la ieng lain naduh dang step ha ki 945 tylli ki jaka thep vote ha ki san tylli ki district ka Garo Hills ban jied ia u nongmihkhmat jongki. Kumba 10 tylli ki mashin EVM la don jingthut bad la bujli noh.  Hynniew ngut ki la thut ha West Garo hills, ar tylli ha North Garo Hills bad kawei ha South West Garo Hills
U Chief Electoral Officer  ka jylla u Bah Frederick Kharkongor u la ong ba ka jingthep vote ka long kaba jai jai bad iaid beit khlem kano kano ka jingjia ne jingpynthut.
Ia ka elekshon shiteng la hap ban pynlong hadien ba u MP uba dei ruh u Lamphang barim ka Lok Sabha u  Purno A. Sangma u la khlad kyndit noh ha ka 4 tarik Lber ba la dep.
U khun shynrang barit duh jong u Purno u Conrad K. Sangma u la iakhun na ka NPP pyrshah ia ka kyrtong ka Congress ka Dikkanchi D. Shira kaba dei ka MLA na Mahendraganj.
“Nga kmen ia ka jingwan iathep vote bun ki paidbah ka Garo Hills ban jied ia la u nongmihkhmat sha  Lok Sabha,” la ong u Conrad hadien ba la thep ia ka vote ha jaka thep vote ha shnong Gondog kaba hap ha Selsella konstitwensi.
“Ngi kyrmen skhem ba ki paidbah kin jied ia nga kum u MP sha ka Lok Sabha kum ka jingai burom ia I Pa jong nga, I Purno A. Sangma” la ong u Conrad.
Ia u Conrad la kyrshan da ka BJP bad ki seng trai ri kum ka United Democratic Party (UDP), ka GNC.
Naduh u snem 1977 haduh ka 4 tarik Lber, ia ka Tura la mihkhmat da u PA Sangma lait noh tang ha ka 1989 bad 2009 haba u PA Sangma u don ha iing dorbar kum u MLA.
Ka Tura Lok Sabha konstitwensi ka kynthup ia ka 24  tylli ki MLA konstitwensi bad ka don 622,189 ngut ki nongthep vote kynthup 315,255 ki shynrang bad 306,934 ki kynthei.