7 Rymphang, elekshon Rajya Sabbha

Shillong,25K’lyngkot:
Ka Election Commission of India ka la phah ia ki shithi sha ki Chief electoral Officer jong ki jylla bapher bapher kynthup ia ka jylla Meghalaya ban pyntip ba ka samoi treikam jong ki 55 ngut ki MP Rajya Sabha kan kut naduh ka 2 haduh 12 tarik u iaiong 2014 katkum ki jingpyntip ba la pyntip sha ki jylla bapher bapher.
Ha jylla Meghalaya ka samoi treikam jong ka kong Wansuk syiem kaba long ka MP Rajya Sabha kaba mynta kan kut ha ka 12 tarik u iaiong 2014 bad ha ka 7 tarik jong u rymphang la pynbna ba kan long biang ka sngi thep vote ban jied ia ki MP ba thymmai. Ka Election Commission of India ka la pyntip ruh ba ka tarik ba khadduh na ka bynta ban thep kyrteng ka long ha ka 28 tarik u kyllalyngkot 2014. Ka la pyntip ba ka jingniew vote yn pynlong hi ha ka juh katei ka sngi ka 7 tarik u rymphang.
Lah ban kdew ba ha ka jylla Meghalaya ka kong Wansuk ka la ioh biang ia ka tiket na ka seng Congress ban dang ia aireng ha kane ka elekshon MP jong ka Rajya Sabha ka ban sa long ha ka 7 tarik u rymphang , na ka jylla Meghalaya ka la don tang kawei ka seat na ka bynta ka MP Rajya Sabha. Kiwei pat ki jylla ba ka Election commission ka la ai jingtip halor ka elekshon MP Rajya Sabha ki kynthup ia ka Maharashtra kaba don 7 seat, ka Odisha , 4 seat, ka Tamilnadu-6 seat, ka West Bengal-5 seat, ka Andhra Pradesh-5 seat, ka Assam-3 seat, ka Bihara-5 seat, ka Chattisgarh-2 seat, ka Gujarat-4 seat, ka Haryana-2 seat, ka Jharkhand-3 seat, ka Madhya Pradesh-3 seat, ka Himachal Pradesh-1 seat, ka Manipur-1 seat, ka Rajasthana-3 seat bad ka Meghalaya 1 seat.