7 ngut na ka Congress, kob ka NPP

Shillong, 11 Risaw:
Ki nongialam ka seng NPP ki la kob ba kane ka elekshon GHADC ka ban sdang lashai ka sngi ka 12 tarik u risaw kan dei ka sngi ba ki paidbah Garo kin ai jingsneng ia ka seng Congress, ka ban long ruh ka dak ka jingpynher syrngiew lypa na ka bynta ka elekshon 2018. Ka seng NPP ka la kob ba mynta ka kynti kan ialam ia ka kynhun synshar hapoh GHADC ryngkat ka ingiatreilang bad ka UDP, BJP bad kiwei pat ki MDC ki seng pyrshah Congress kumjuh ruh bad ki MDC ki ban jop kum ki MDC shimet.Katei ka seng ka la kob ba ka seng Congress lada bun eh kan jop tang 7 ngut ki MDC bad kan ym lah ban jop palat ia kata bad kitei ki 7 ngut ruh ka la ong ba ki dei ki briew kiba u paidbah u ieit u thoin eh ia ki hi shimet ym dei ba ki ieit ia ka seng Congress. Kumba ka long mynta ka seng Congress ka la pynieng kyrtong lut ha baroh 29 tylli ki konstitwensi katba ka seng NPP pat ka pynieng tang 26 ngut , ka UDP 14 ngut tam bad la don ruh ki kyrtong jong ka BJP 6 ngut bad kiwei pat ki seng.Lah ban kdew ha ri lum Garo ka don ka jingiakhih ki sengbhalang kiba la pyrshah jur ia ka jingai tiket ki seng sain pyrthei ia ki bym dei ki riewlum , bad ha katei ka jingai tiket la iohi ba ka seng NPP ruh ka la ai tiket ia u bym dei riewlum , halor katei ka bynta ki nongialam ka NPP ki la ong ba kim lah ban kyntait namarba ka ain ruh kam khang ia ki bym dei riewlum bad ba kawei ruh ym don ki riewlum kiba pan tiket na katei ka seng ha ka konstitwensi kaba ki la ai tiket sha u bym dei riewlum.