7 Naitung, yn leit jurip u Bah Paul, ia ki jaka ia kajia bad ka Assam

Shillong:U Chairman ka Regional Committee jong ka West Khasi Hills Sector u bah Paul Lyngdoh un leit ban jurip sha khappud ka West Khasi Hills ba iakajia bad ka Assam ha kane ka taiew.

U bah Paul lem bad ki ophisar kin leit jurip ha ka 7 tarik mynta u bnai ban bishar bad iasyllok ia ki paidbah ba don ha ka thain khappud. Ka thain West Khasi Hills ka don ki jaka kiba iaknieh bad ka Assam kum ka Langpih bad kiwei ki jaka, ha kaba ka sorkar Assam bad ka sorkar Meghalaya kin pynbeit ha ka kylla baar hadien ba ki 6 tylli kila dep ban pynbeit na ki 12 tylli ki jaka ba iakajia.

Kiwei ki Regional Committee jong ka Jaintia Hills bad ka Ri-Bhoi Sector kila dep iashong jingialang dang shen bad kaba sah ka long ban pynlong ia ka jingleit jurip sha khappud ban iakynduh ia ki paidbah, khamtam ban kylli ban pyrthew shano ki kwah ban leit, la ka dei sha Meghalaya ne sha Assam.

Ia ka Jaintia Hills Sector la khlieh u symbud myntri rangbah u bah Sniawbhalang Dhar katba ia ka Ri-Bhoi Sector la khlieh da u symbud myntri rangbah u bah Prestone Tynsong.