7 lak tynrai, ki dieng yn thung shi sngi, ong u DC

Shillong, 24 Naitung:
Ban pynjyrngam ia ka mariang ha East Khasi Hills, u Deputy Commissioner u la ong ba ka sor kar kan pynlong ia ka prokram thung dieng ha ka 30 tarik Naitung bad tang ha kane ka sngi, yn thung haduh 7,00,700 tylli ki tynrai dieng.
Kane ka jingthmu ka long ban wanrah ia ka dur jyrngam ha ka district bad ha ka jylla bad ruh ban pynsngewthuh ia ki samla ia ka jingdonkam ka ma riang. Ia kane ka jing thmu yn pynlong na ka skhim Chief Ministers Youth for Green Campaign kaba hap ha Mission Green ka IBDLP.
Ka ophis u Deputy Commissioner, East Khasi Hills District ka la pynbeit ia kane ka prokram ryngkat ka jingiatreilang bad ka tnad Forest bad ka Soil and Water Conservation Department.
U Deputy Commissioner u Sanjay Goyal u la ong ba na ka bynta kane ka jingthmu, la shim 8 tylli ki block ha ka District ban pynlong ia kane ka prokram.
Ia kane ka jingpyrshang la buh rekod ruh ka Limca Book of Records jong u snem 2016. Hynrei ka rai ba khadduh halor kane, yn sa leh hadien ba la dept hung ia ki dieng.
U la ong ba ka bor synshar district ka la dep iakren ruh ia ka Guinness World Record Authorities ban pynrung ha ka World Record ia kane ka jingthung dieng bad mynta dang ap na ki halor kane.
Ka 30 tarik Naitung la ju rakhe kum ka sngi International Friendship Day bad la pynlong ia kane ka prokram ban pynlong ia ka jingsngew iadei paralok bad ka mariang ban pynlong ia ka Meghalaya kaba jyrngam.
Katkum ka jingong u DC, ha kane ka prokram, yn iashim bynta ki paidbah nongshong shnong, ki nongtrei sorkar, ki khynnah skul.
U DC u la kyntu ia baroh ki briew ban leit sha ki jaka ba la pynbeit ia kane ka jingthmu bad ban iashim bynta khnang ba kan long kaba jop.
U Myntri Rangbah ka jylla un pyntreikam ia kane ka prokram da kaba leit thung dieng ha Leit Thiepbah hajan ka law kyntang Mawphlang ha ka por 9 baje mynstep ha katei ka sngi.
Ban pynthikna ba kine ki dieng kin im, u DC u la iathuh ba la buh ban peit ia ki ban sumar hapoh san snem.
Ka Forest Department kan thung 216700 tylli ki dieng ha ka jingheh ka jaka ba 453 hetar katba ka Soil and Water Conservation kan thung 151000 tylli ki tynrai dieng ha ka jingheh ka jaka 152 hetar.
Kumjuh ki BDO kin pynthung dieng 243000 tylli ha ka jingheh ka jaka ba 233 hetar katba ka Ecological project, Sohra kan thung 90000 tylli ki dieng ha ka jingheh ka jaka ba 69.23 hetar.