Shillong: Yn pynlong ia ka Tamasa Kbeit lane Amur Falcon kaba saw ha ki 2 sngi kata ha ka 7 bad 8 tarik u naiwieng ha Tyrso Pyllun kaba hap hapoh Ri-Bhoi District. Ia kane la pyntip dau Secretary ka Tyrso Wildlife Protection Society u bah Alos Nongpoh. U bah Alos u la iathuh ba kitei ki sim Amur Falcon ki la sdang poi sha Tyrso naduh ka 14 bad 15 tarik mynta u bnai bad ka jingwan poi jong ki katto katne tylli ka dei ka dak ka jingwan bun jong ki kumba long manla u snem. Kitei ki sim ki ju shong ha katei ka shnong kumba shibnai eiei bad shuwa ban sdang ka aiom khriat kata ha ki 20 tarik shajrong ki sdang ban mih noh. Ha katei ka tamasa kin don ruh shibun ki jingialehkai pynbyrngia kum ka jingialehkai phutbol, ka jingiakob dro dur, ka jingiakob ai rong dur na bynta ki khynnah skul bad kan don ruh ka jingiamreh thong na ka bynta kiba hapoh ka 60 snem karta.