69 ngut ki briew kiba don ha ki jaka sumar, ong u Dr War

Shillong: U Director ka tnad ka koit ka khiah u Dr Aman War, u iathuh ba na ki 1220 ngut ki briew kiba don ia ka jingpang Covid -19 ha ka jylla, 69 ngut ki briew ki dei kiba don ia ka dak ka shin jong ka jingshitom Covid -19 (symptomatic).

Haba ia kren bad ki lad pathai khubor, u Dr War u la iathuh ba kine ki 69 ngut ki briew kiba phah sumar ha ki hospital ki kynthup ia ki 25 ngut ha Civil Hospital Shillong, 10 ngut ha NEIGRIHMS Hospital, 16 ngut ha RP Chest Hospital, 9 ngut ha Tura Civil Hospital, 3 ngut ha Ampati Civil Hospital bad 6 ngut ha Rusubelpara Civil Hospital. U Dr War u iathuh ba kiwei kiba don ia kane ka jingpang ki dei kiba shait ba khlain bad ki bym don ia ki dak ki shin ba ki don ia kane ka jingshitom (asymptomatic) bad bun na ki, ki dei kiba sumar hi ha la ki ing ki sem bad ha ki Corona Center.

Halor ka jingtest naphang ha Khyndai lad, u Dr War u la iathuh ba mynta ka sangi la test ia ki 79 ngut ha kaba 13 ngut na ki long Covid positive, hynrei ia kine ym pat shim ha ka jingkhein, namar ba ka jingtest naphang, ka dang iaid sha khmat.