628ngut ki don ha hospital bad 102ngut kiba shitom jur, ong U MR, halor kiba ioh covid ha ka Jylla

Shillong: U myntri rangbah ka jylla, u Conrad K Sangma, u iathuh ba haduh 628 ngut ki briew kiba ioh ia ka jingpang Covid -19, ki don ha ki hospital bad na kine 102 ngut, ki dei ki ba shitom jur bad ki don ha ICU kat ba 227 ngut ki dei kiba hap ha ki Categories “C”, ki 150 ngut ki dei ki ba hap ha ki categories “A” bad 184 ngut ki dei kiba hap ha ka Categories “B”.

Haba ia kren bad ki lad pathai khubor, u myntri rangbah u la iathuh ba mynta ka sngi 584 ngut ki briew ki dei ki ba iohpang thymmai, kiba la ioh jingkoit ki dei 808 ngut bad ki ba la khlad ha kane ka 24 kynta ki long 18 ngut.
U myntri rangbah u la ong ba ka active ratio, mynta ha ka jylla ka long 16.9 %; kiba jem na ka jingpang kia long 82.1% bad kiba iap, ki long 1.7 %.
U myntri rangbah u la iathuh ruh ba na ki 6110 tylli kiba don jingpang ha ka jylla, 2119 ngut ki dei ki ba hapdeng ka 15 haduh 29, ki 1781ngut ki dei naduh ka rta ka ba 30 snem haduh 44 snem; kane ka mut ba kumba 4,000 tylli ki case lane 75 % ki cases ki dei ki ba la 45 snem shajrong.
U myntri rangbah, u la iathuh ba ha jingialang, kaba la long mynta ka sngi, la iakren ban pynkhlain ia ki jaka sumar ki ban sa wan kham tam ki oxygen plant ki ban buh ha baroh ki District.

Ka Crygonic plant ka ba don ha Umsawli bad Jangjal ka la iaid shait shait shakhmat, ban pyndep noh ia kine ki plant. U la ong ruh ba ka jingai dawai injek, ka dang iaid shakhmat ha kaba 66,000 tylli ki dawai, kin sa wan poi hadien shitaiew bad kane ka dei na ka bynta ki ba la 18 snem haduh 44 snem ka rta.
Haba ia kren bad ki lad pathai khubor, u myntri rangbah u la iathuh ba ka sorkar ka lah dep thied ia ki 66,000 tylli ki dawai, na ka bynta ki ba la 18 snem haduh 44 snem ka rta, ha kaba ka sorkar, ka la dep siew pisa bad kine kin sa wan poi ha ka jylla hadien ka san lane hynriew sngi.

U myntri rangbah u la iathuh ruh ba ka jingai dawai injek, ia ki briew ba la 45 snem ka rta shajrong ka la jan poi sha ki 71 hajar dose, hynrei namar ka jingduna ki vaccine ka sorkar kam shem la lah ban pynbiang kum ba la thmu, hynrei kan ialeh shitom ban pynbiang ia ki vaccine ia ki nongshong shnong ha ki sngi ban wan.