6 shah tam ka Meghalaya, ha ka aksiden ha ka Ri

Shillong, 4 Rymphang:
Ka Jing aksiden ha India ka jur bha ha ki por mynmiet bad kat kum ka jingbatai jong ki stad na ka Central Institute of Road Transport ka sorkar India, la iathuh ba haduh 60 percent ka jingjia aksiden kali ka jia ha ka por mynmiet.
Katkum ka jingkhein jong u 2014, ka jingjia aksiden ha jylla Meghalaya ka la tam hynriew shah, kat kum ka jingkhein ha ka ri baroh kawei bad ia kane la ong da u Additional Chief Secretary ka tnad kam pohiing ka sorkar jylla u KS Kropha.
Haba kren mynta ka sngi ha ka jingialang ban iatai kumno ban pynlait na ka jingaksiden kali ba long ha Polo Tower Shillong, u Kropha u la ong ba ka jingbun ki kali ha kane ka jylla ka la nang kiew bun shah hynrei ka jing pynheh ia ki surok pat ka long kaba suki bha.
U la ong ba donkam ban pynheh ban pynbha ia ki surok bad ban pynbiang ia ki dak ki shin ha ki surok khang ban pyllait shi bynta na ka jingaksiden kali.
La ong ruh ba ki pulit pyniaid kali kim dei ban ailad ia ki nongniah kali ki ba pynkhein ia ka ain pyniaid kali wat lada dei ka jingbakla kaba rit ruh ym dei ban pyllait namar lada leh kumne kan ialam pynban sha ka jingjia ba kham heh shuh shuh.
U Kropha u la ong ruh ba ka tnad pyniaid kali lane ka Transport department ka dei ban pyrkhing bha ban ai laisen niah kali namar ba ka jingjia aksiden ka mih na ki nongniah.
Shuwa ia kane u SN Dhole na ka Central Institute of Road Transport u la ong ba ha India 1.38 lak ngut ki briew ki iap na ka jingjia aksiden bad 60 percent ka dei ka jingjia aksiden ha ka por mynmiet.
U ong ba ka jingjia aksiden ki kali kam tang namar ba ki draibar ki leh thurmur ne bakla hynrei teng teng ka mih ruh namar ka jinglong jong ka surok bad kiwei ki daw.
Ha kane ka prokram la wan iashim bynta na ki tnad Transport jong ka jylla kane ka thain lammihngi ka India kynthup ruh na kolkatta, Kerela, Tamil Nadu, Odisha, Jharkhand bad na kiwei de ki tnad sorkar.