6 ngut pynbna kyrtong ka UDP, shem jingeh ka Mawsynram-Laban Mawprem

Shillong,17 lyngkot:
Mynta ka sngi ka UDP ka la pyllait biang ia ka thup kyrtong kaba ar jong ka ha kaba ka la pynbna haduh 6 ngut ki kyrtong ki ban ia aireng ha kane ka elekshon MDC 2014 ka ban sa long shen ha ki taiew pdeng u rymphang. Ki hynriew ki kyrtong ba ka UDP ka la pynbna ki long u Balawan Syiemiong na Jirang constituency, u Biolkingstar Timung na Mawhati constituency,  u Donkupar Sumer na Um sning, u David Kharsati, u MDC barim na Sohryngkham constituency, u MDC ba mynta u Bah Teinwell Dkhar na Shella constituency bad u Bah Hadrian Lyngdoh na Mawkyrwat constituency. Haduh mynta ka UDP ka la pynbna haduh 12 ngut ki kyrtong hynriew ha ka thup ba nyngkong bad hynriew pat ha ka thup kaba- ar katba ki don haduh 17 tylli ki konstitwensi kiba ka seng kam pat lah ban rai hano ban ai ia ka tiket namar ba la ong ba ka jingiaknieh tiket ka jur bha. Ka UDP ka don ka jingthmu ban pynieng kyrtong lut ha baroh ki 29 Konstitwensi jong ka KHADC.
U Bah A.F Dkhar u la ong ba shen ka seng kan sa pyllait lut ia ki kyrtong jong ki 17 tylli ki konstitwensi ki ba dang sah, u la ong ruh ba ka jingslem ban pynbna ia ka tiket ka dei namarba ki la don ki konstitwensi kiba la jur bha ka jingiaknieh tiket katba u la kam pat ba ka seng kan shim ia ka rai jong ka katkum ki kyndon kiba ia sngewthuh jingmut lang. U Bah Allan u la ong ruh ba ki konstitwensi kiba ka seng ka kham shem jingeh ban rai ia u kyrtong ka dei ka Laban-Mawprem, ka Langrin, ka Umroi bad ka Mawsynram.
Katkum ka khubor ba la iohlum, la iathuh ba na ki konstitwensi kiba ka seng kam pat shym la pynbna kyrtong, ka seng ka lah ban pynieng da ki briew kiba rim ym kiba thymmai, ki lah ban long ki MDC ba mynta ne ki MLA ba mynta lane ki kyrtong kiba la shah rem ha ka elekshon MLA 2013 kiba dei ki briew jong ka party.