6 kynta tam dum tliw ka Upper Shillong

Shillong, 12 Risaw:
Ka Upper Shillong ka la shong dum tliw khlem bording la kumba 6 kynta tam mynta ka miet, ka jinglip bor ding ka la sdang naduh ka por 4 baje janmiet bad ka la meh haduh ka por 10 baje tam mynmiet. U nong thohkhubor u la phone sha ka ka ophis ka MeECL ha ka landline nombar kaba don ha 7 mer Upper Shillong hynrei ka jubab ba la ioh ka long ba kan shim por namar ba ka dei ka jingduh kaba la heh. Haba la pyrshang pat ban phone sha u ophisar ba don ha katei ka thain u bah Kharbuki um shym la shim ia ka phone jong u, bad kham hadien la phone ia ki bor ba kham halor ban ujor ia katei ka jinglip ding bad hadien kumba katto katne kynta la ioh ding biang ha ka thain Upper Shillong. Lah ban kdew ba katei ka jingthud ka bording ha ka thain Upper Shillong ka dei kaba la ju jia bunsien na ka por sha ka por ha kaba la dep ban ujor wat sha u nongmihkhmat ka Mylliem Konstitwensi u bah Ronnie V Lyngdoh ba un leh ia kaba donkam ha kaba utei u nongmihkhmat u la dep ban phah da ka jingthoh sha ki bor bahalor ka MeECL, hynrei wat hapdeng kitei ki jingshimkhia u nongmihkhmat bad wat hapdeng ka jingujor ki paidbah ki briew kiba peit ia ka bording ha ka thain Upper Shillong kim shym la suidniew satia.