6 kynta shah thngan ki nonghikai NEHU, na ki 13 mat

Shillong, 07 Nailar:  
Ki nonghikai ka skulbah North Eastern Hill University (NEHU) hapoh ka lama ka North Eastern Hill University Teachers’ Association (NEHUTA), lem bad ki nonghikai jong ki skulbah bapher bapher ha ka ri ki la pynlong ia ka jingshong shah thngan kaba 6 kynta mynta ka sngi naduh ka por 10 baje mynstep haduh 5 baje janmiet ha phyllaw ka NEHU ha Mawkynroh ban pyrshah ia ka rukom leh ka University Grants Commission (UGC).
Ki nonghikai ki la iashong hakhmat ka Multi Purpose Convention Auditorium ha NEHU Campus, ban dawa ba ka UGC ka dei ban pynbeit ia ki jingbym iahap ba ka leh na ka bynta ki nonghikai kiba don haduh 13 tylli ki mar jingdawa.
La pynlong ia kane ka jingshah thngan ba la khot da ka All India Federation of University and College (AIFUCTO) ha Jantar Mantar, ha New Delhi bad kyrshan da ka Federation of Central University Teachers’ Association (FEDCUTA). Ki jingdawa jong ki nonghikai skulbah ki long ba ka UGC ka dei ban thaw noh ia ka 7th Pay Review Committee,  ka jingpdiang ka tnad Human Resource Development (MHRD), ka rai jong ka UGC halor ka 3rd Amendments ka  UGC Regulation-2010 bad Ph.D. Regulations 2019,  ban pynduh noh ia ka Account Performance Index, ban siew pay scale sha baroh ki nonghikai, librarian, DPE bad ki nongtrei, sangeh ban pynlong mar khaii ia ka tnad pule dangle, ka jingkyntait ia ka Pension Scheme-2004 bad dawa ban iasyllok ia ki nonghikai haba thaw ia ka Education Policiy.
Haba kren ha kane ka jingiashong shah thngan, u president ka NEHUTA u  Prof. V. Ruata Rengsi u la ong ba ka skulbah bad ki kolej ha ka ri ki la dawa ba ka UGC ka dei ban pyntreikam noh ia kine ki jingdawa jong ki nonghikai khlem buh teng shuh.
“Ngim kwah ia ka jingleh shiliang ia ki nonghikai. Ngi kwah ia ki nonghikai barim bad ba thymmai ban ioh lang ia ka GPF bad ka UGC ka dei ban pynduh noh ia ka CPF jong ki nonghikai thymmai”, la ong u Prof. Rengsi. U la ong ba ka UGC ka dei ban weng noh ia ka jingpyntreikam ia ka Choice Based Credit System naduh u Naitung 2015 bad ban weng ruh ia ka Central University Bill-2013. “Kino kino ki jingpynkylla kiba ktah ia kiba bun, dei ban iasyllok shwa bad kiba shah ktah kum ki nonghikai, ym ban shu leh hi”, la ong u Prof. Rengsi.
Katba u Prof. Mao u la ong ba ki nonghikai ki pyrshah jur ia ka jingwan buh ia ki skulbah ha ka ri nabar ri namar ba kane kan pynlong kam khaii ia ka tnad pule puthi ha ka ri.