Nongstoiñ: Kum shi bynta ban nang kyntiew ia ki kam jngohkai pyrthei hapoh ka Dewlynnong Nongkhnum bad ruh ban plie lad plie lynti ia ki samla katei ka thaiñ ha ka ioh kam ioh jam, kumta ka ophis jong u District Sports Officer West Khasi Hills Nongstoiñ ryngkat ka jingiatrei lang bad ka District Sports Promotion Society (DSPS) lem ruh bad ka Nongkhnum Area Lai Shnong Integrated Village Co-operative Society (NALSIVCS) ki la ioh ban pynlong ia ka jingai jinghikai na ka bynta ki samla ka thaiñ Nongkhnum ha kaba iadei bad ka River Rafting bad Kayaking ha kaba u Deepak Rana u la long u nongai jinghikai.
U DC bad DSO ka WKHD kiba dang shong ha ka lieng bala niah da ki samla bala shah pyntbit:Rupang
Katei ka prokram ai jinghikai, kaba la neh haduh 6 bnai kynthih hapoh ka Pheinam Beach, la ioh ban pynkut noh myn hynnin ka sngi ha kaba ki khadhynniew ngut ki samla na ki lai tylli ki shnong ba kynthup na ka shnong Dilingiem, Nongkhnum bad Diengsyiang kiba don ha syndah jong katei ka Dewlynnong Nongkhnum, ki la ioh ia ka jingshah pyntbit kaba pura ha ryngkat ki syrnod ha kaba iadei bad katei ka rukom kieng lieng Kayaking bad Rafting.
Ha katei ka sngi pynkut noh ia katei ka prokram la ioh ruh ban pynlong iaka jingialang kaba lyngkot hapoh ka Pheinam Beach kaba dei ruh ka khyndew jong ka kur Iawren bad Iawlar ha kaba u bah T. Lyngwa IAS Deputy Commissioner ka West Khasi Hills u la long kum u kongsan, ha ryngkat ka jingdonlang ruh u bah P.B War Nongbri DSO ka WKHD Nongstoiñ, u Secretary ka NALIVCS u bah S. Marthong, ki nongialam shnong jong kitei ki lai shnong, ki samla bala shah pyntbit bad kiwei kiwei de.
U Deputy Commissioner ka West Khasi Hills u bah T.Lyngwa IAS haba kren kum u kongsan ha katei ka sngi u la ong ba ka long kaei kaei ka kam kaba dang long thymmai bad u la pynpaw ba um ju pat lap hapoh ka Jylla ba ka don kum kane ka jing ai jing hikai (training) bad u la ai mynsiem ia kitei ki nong ia shim bynta ba kim dei ban shu kut bad sangeh tang hadien katei ka jing ai jing hikai.
Shuh shuh u DC u la kyntu ruh ba ki dei ban nang praktis ha kino kino ki por kiba lap khnang ba kin nang lah shuh shuh ban pyntbit. Ym tang katta u DC u la ai jingmut ruh ba kim dei ban leh ha ka por lyiur, hynrei ki dei ban leh tang ha ka por tlang haba ka um ka rit khnang ban lait na ki no kino ki jingmynsaw hynrei yn da ki la long kiba tbit bha ki lah ban leh ha kino kino ki jaka wat ha ki lad lad jong ka um bah.
Haba ia jingkren ha katei ka jingialang kaba lyngkot na ka liang jong u DC u la kular ba un sa thaw ia ki lad ki lynti na ka bynta kum kitei ki jingai jinghikai ha kaba iadei bad katei ka rukom kieng lieng khnang ba kan long kaba ia ryngkat kyrdan bad ki wei pat ki jaka ha ka ri jong ka pyrthei da kaba u la ong ruh ba un iai budien ia katei ka kam khnang ba kan long kaba sei soh na ka bynta ki samla kiba thrang ban pyntbit ia lade ha kaba kum katei ka jait sport.
“Ngin iai pyrshang ban nang wanrah shuh shuh sa ia kiwei pat ki nong ai jinghikai kiba kham tbit shuh shuh (Trainers) khnang ban pynpaw nam ia katei ka jait jingialehkai sports hapoh ka District bad ka Jylla hi baroh kawei” ong biang u DC.
Katba na ka liang jong u Deepak Rana u ba dei na ka nongbah Shillong haba iakren bad ki nongthoh khubor, u la ong ba u la ioh ia ka jingnang ha kaba iadei bad katei ka rukom kieng liang na shabar ka Jylla bad u la iathuh ruh ba u la long ruh uwei na ki nong iaking lieng u bala leit ban iashim bynta ha kylleng ki Ri jong ka pyrthei bad u la don ha katei ka kam la kumba 18 snem ei ei.
“Hadien ba nga la wan phai sha Shillong la ioh ia ka lad ban wan sha Nongkhnum lyngba u DC ban wan ai jinghikai ia kine ki samla khynnah jong kine ki lai tylli ki shnong bad ha kine ki 6 bnai ba u la ai ka jing hikai u la lap ba kitei ki khynnah kiba wan ban ia shim bynta lang ki long kiba kohnguh hynrei ka jingeh ka long ba ngam shymla iapei ia ka ktien ka thylliej hynrei hadien katto katne bnai ba nga la don lang nga la lah ban sngewthuh khyndiat khynsoit ia ka ktien shnong ha katei ka jaka” ong u Rana.
U Deepak u la iathuh ruh ba katkum ka jinglap ka jong u kitei ki khynnah kiba la wan ban shah hikai ki long kiba tibit bha ban jngi naduh kiba dang 5 snem ka arta haduh kiba 12 snem ka arta ki long kiba tbit bha ban jngi kynthei bad shynrang bad katei ka jingnang jngi ka jong ki ka long kaba kongsan bha namar ha kum katei ka jait jing ialehkai ki nongkieng lieng kidei ban long kiba tbit ban jngi.
Shuh shuh u Deepak u la kyntu ruh ia ki tei ki khynnah ba kin nang trei shitom shuh shuh nalor ba ki la ioh ia ka jinghikai kiba u la ai bad u la ong ruh ba lada ki don kam ia ka jingiarap na u ha kano kano ka por u kloi ban wan khlem ka jingsiew dor “Ngam kwah ei ei na ki hynrei nga kwah ba kine ki khynnah kin paw bad kin long ruh kiba tbit ha ka jingiakieng lieng hapoh ka Jylla ” u la ong
U Deepak u la ai jingiaroh ruh ia u Dew Lynnong Nongkhnum da kaba u la pynpaw ba ha ka jingiaid lynti ka jong u ha kylleng ki jaka jong ki ri ka pyrthei ka Nongkhnum kadei kawei na ki jaka kiba biang pura ban kieng lieng Kayaking bad Rafting bad ha katei ka sngi la ioh ruh ia ka jingpyni ia ka sap kieng lieng katta ha ka Kyaking bad River Rafting na ki tei ki khynnah kiba la shah pyntbit.