Shillong:Ha ka jing ialang bala khot da ka tnat pule ka jylla haka 25 tarik iaiong 2020, naka liang ki nong pyniaid skul kyn thup ia ka Shillong Archdiocese Education Society (SAES) ki la kyntu ba ki skul shabar ka nongbah Shillong kin plie noh haka 5 tarik jymmang 2020 naka bynta ki khynnah klas IX, X bad klas XII.
U Chairman ka Shillong Archdiocese Education Society (SAES) u Fr John Madur u la iathuh ki skul shabar ka nongbah Shillong ki lah ban plie noh haka 5 tarik jymmang naka bynta ki klas IX, X bad XII katba naka bynta kiwei ki klas pat ki lah ban plie ha ka 11 tarik jymmang 2020.
Haba dei bad ki skul hapoh ka nongbah Shillong kaba hap ruh hapoh ka ‘Red Zone’, u Fr John Madur u la iathuh ba ki lah ban plie haka taiew ba 3 ne 4 jong u bnai jymmang hynrei haduh da la ioh jingbit naka tnat pule ka jylla.
Haba dei bad ka jing map ia ka bai skul ki khynnah, naka liang u Fr. John Madur u la ong ba ki skul ki dei ban map kumba 50 percent ia ka bai skul khamtam ia kito ki khynnah kiba wan naka long ing ba duk bad ki nong pyniaid skul lane ka ‘SMC’ kan hap shim khia haba dei bad ka jing map ia ka bai skul.
Haka jing ialang haka 25 tarik, ki nong pyniaid skul kila kyntu ba ki klas ki lah ban long haduh ka taiew ba 2 jong u bnai nohprah bad ki skul ki lah ban pynlyngkot ia ka shuti puja bad ki lah ruh ban pynlong klas ha ka sngi saitjain kum shi bynta ban pyndep ia ki ‘Syllabus’.
Naka liang u Fr. John Madur u la iathuh ruh ba kan don tang ka ‘Unit Test’ bad ka phainal eksamin kum shi bynta ban pynkiew klas ia ki khynnah mynta u snem.
ki college pat leh kmno