5ngut ki kyrtong, la ioh kyrteng ka UDP East Khasi hills

Shillong:Kum shi bynta ban pynkhlain bad dang pynkhreh na ka bynta ka election 2023, ka Executive Committee jong ka East Khasi Hills District jong ka United Democratic Party (UDP), mynhynnin ka sngi ka la pynlong ia ka jingialang ha kaba ka la ioh ban pyndap biang ia ki kam, kiba la thylli na ka jingieh noh kam, ki katto katne ngut ki nongkitkam.

Haba kren bad ki lad pathai khubor na ka liang u bah Titos W Chyne, President ka East Khasi hills, ka party UDP, u la ong “Kane ka jingialang la pynlong ban ia kren bad ban pynkhlain ia ki constituency kiba hap ha ka Excutive Committee jong ka East Khasi Hills District kiba don 10 tylli”.

U la iathuh ruh “Mynta ka sngi ngi la ioh ia ka jingtyrwa na ki Circle District Election Committee na ka bynta ki 5 ngut ki kyrtong kaba kynthup ia u bah HDR Lyngdoh na Sohiong, U bah Mitchel Wankhar na Mylliem, na Shella u bah Balajied Synrem, na ka Mawsynram u bah Olan Suin bad na Pynursla u bah Anthony Kongwang”. U la bynrap shuh shuh “Ia kine ki kyrteng jong ki kyrtong na ka liang ka CDEC kan sa phah sha ka State Election Committee ba kan ai ka jingmynjur”.

U bah Chyne u la ong ruh “Kiwei pat kiba ki CDEC kim pat phah ia ki kyrteng jong ki kyrtong ki kynthup ia ka Mawrynkneng, ka Sohra, ka Mawkynrew, ka Nongkrem bad ka Mawphlang”. “Ha kaba ia dei bad ka Mawphlang ngin hap thaw biang ia ka circle hadien ba ka la pyndam ia ka, bad ha Mawphlang Constituency kum ba ka long mynta ngim don ia ka circle bad ngin hap thaw shwa ia ka Circle bad ngin sa pynthikna la u bah Eugene Son un dang ia khun ne em” . U la bynrap shuh shuh “Ngi la ioh ruh ban thung thymmai ia ki nongkitkam jong ki district ha ki jaka ba la iehnoh kam bad jied ia ki katto katne ngut ban long kum ki nongkitkam” .

“Ki nongkitkam ki ba la pynskhem mynta ka sngi ki kynthup ia u bah Balajied Synrem kum u advisor, ki Working President kiba kynthup ia u bah Remington Pyngrope, u bah Monarch Shabong bad u Dr O.S Jyrwa, katba ia u bah Wellbirth Rani la jied kum u Vice President bad kiwei kiwei”u la ong.

Na ka bynta ka Nongkrem Constituency u la ong “Ngim pat ioh ia ka jingtyrwa nangno nangno ruh bad ka party ka don la ka kyndon bad ym lah ban shu kam ban ai tiket khem pat ka jingai jingmut halor u kyrtong bad hap ban phah da ka circle bad kan phah sha ka District bad nang ne sha ka State Election, kiwei ki lah ban kam ba ki pan tiket, hynrei ka rai ban jied yn sa shim da ka state Election Committee jong ka party”. Ha kaba iadei bad ka Sohra, u la iathuh ba ka Circle kan sa shong da ka jingialang bad yn sa phah ia ka kyrteng u kyrtong.