53 tylli ioh bat ka FKJGP ia ki masi, ban shalan sha Bangladesh

Nongpoh, 3 Rymphang:
Ki nongialam jong ka seng FKJGP, North Khasi Hills District, hynnin ka sngi ha ka por 8 baje ei ei mynmiet, ki la ioh ban bat ia ar tylli ki trok kiba don ia u number ML 06 5018 bad AS 01 DD 9784 kiba kit ia ki masi ban shalan tuh sha Bangladesh, katba kitei ki trok ki dang ha Umling, Ri Bhoi District.
Haba iakren bad u Bah Lui Lyngdoh, General Secretary ka FKJGP, NKHD, la ong ba haba ki nongialam ka seng ki la tohkit na kitei ki nongniah ia kitei ki trok, la ioh ia ka jingtip ba kitei ki masi ki dei jong ka kong Menika na Laitlyngkot bad ka Baily na Guwahati, ha kaba lada khein lang ia kitei ki masi kiba la ioh ban kurup ka la poi sha ka 53 tylli.
U la iathuh ruh, ba kitei ki masi kiba la ioh ban kurup kim don satia ia kita kiba la dep sam shkor bad ki kynja Certificate na ka tnat Veterinary ha shwa ban pynlait na ka Iew Die masi kaba don ha Khanapara, kiba lah ban pynshisha ba kitei ki masi ki long kiba bit ba biang, na ka bynta ban bam da ki paidbah ha ka jylla.
Kumta hadien kane ka jingioh ban kem ia kitei ki masi kiba la thmu ban shalan beain sha Bangladesh, kum ka seng ka pynpaw ia ka jingsngewkhia, namar ba kane ka jingshalan tuh ia ki masi sha Bangladesh kam sangeh shuh bad la lap pynban ba ka nangjur nangjur katba nangmih ki sngi.
Hadien ba la ioh bat ia kitei ki masi, ka seng ka la pyntip noh sha ki pulit halor katei ka jingioh kemi masi bad hadien katei pat ka seng ka la pynphai biang ia kitei ki masi sha Khanapara, ha kajuh ruh ka por ka seng ka maham jur ruh ia ki draibar kali bad ki nongkhaii tuh ia ki masi sha Bangladesh bad lada lap biang ka seng kan sa shim da ki lynti kiba kham tyngeh, pynkut u Bah Lui Lyngdoh.