50ngut ki doktor, ki la iap ei na ka corona ha Italy

Ki don 50 ngut ki doktor, kiba la duh ei ia la ka jingim, na ka jingpang coronavirus ha Italy.

Mynta ka sngi, ka National Federation of Orders of Surgeons and Dentists (FNOMCeO), ka la pynthikna ia ki kyrteng jong ki doktor, kiba la iap na katei ka jingpang.

Kitei ki kyrteng, la pynmih paidbah, ha ka por ba ka jingiap ha Italy, ka la poi sha ka 10,023 ngut bad sa 889ngut kiba iap ha ki 24 kynta ba ladep. La iathuh ba na kitei kiba iap, ki don 17ngut kiba iap ha ki jaka jong ka Lombardy, kaba dei ka jaka kaba jur tam ka Covid-19.

Hynnin ka sngi, la hap ban pyndonkam da ki shipai ban leit tep briew bad leit kit shabar jong ka Bergamo, kaba don shatei jong ka Italy, namar ba katei ka nongbah, kam don jaka shuh ban tep briew.