Shillong:Ka Hima Nongkhlaw kaba pynmih ia u khlawait ka jaitbynriew, u Syiem Tirot Sing Syiemlieh ka dap 500 snem naduh ba la seng ia ka Hima. Ia ka Hima Nongkhlaw la tip ruh kum ka Hima Khadsaw Phra namar ba la thaw ki 14 tylli ki Raid bad 8 tylli ki Lyngdohship.
Ka jingpaw nam jong ka jingkhraw kane ka Hima ka dei na u Syiem ba shiphew jongka, u Syiem Tirot Sing uba la ieng ban ialeh da ka thma ka swar pyrshah ia ka sorkar Bilat ha u snem 1829 kaba la kot sha ka 195 snem mynta.
Kane ka Hima ka la pynmih 20 ngut ki Syiem bad 5 ngut ki Acting Syiem ha kine ki 500 snem ba la leit. U Syiem ba mynta u Paiem Phrestar ula shimti ha u snem 2005 bad u dei u Syiem uba 20.
Halor ka jingdap 500 snem ka Hima, u Paiem Phrestar Manik Syiem lem bad u Syiem Khynnah paiem KM Syiem bad kiwei, kila pyntip ba ka Hima kan leh burom da kaba rakhe kyrpang ia ka jingdap 500 snem jongka mynta u snem.
Ia ka Hima Nongkhlaw la seng ha u snem 1524 ba la synshar u Syiem Shajer Syiem haduh 1554 shwa ban bud ter ter sa kiwei pat ha kane ka Hima kaba iar naduh Kamrup jongka Brahmaputra ka Assam ba mynta shaduh Sylhet, ka Bangladesh ba mynta.
Haba kren mynta ka sngi, u Paiem Phrestar ula ong ba ka jingplie ia kane ka jingrakhe kan long ha ka 6 tarik Nohprah 2024 ha Mairang bad kan pynkut ha u Iaiong 2025, kata lashem snem.
Ka Hima Nongkhlaw ka ioh ruh ia ka shnong Sohrarim bad ka Laitkynsew kaba don ha East Khasi Hills ba mynta.
Shi bynta ban pynphuh pynphieng ia kane ka jingrakhe, ka Hima ka la pynkhreh ban pyllong ia ka jingiakop bapher bapher kum ka jingiakop kynjatbol ia ki shnong ba hap ha ka Hima, basketball, niah saikil, iakop siat khnam, marathon, shna skit halor u Tirot Sing, jingiakop khwai, iakop tyrko nalor kiwei pat ki jingialehkai, ki jait kam ban pynkhraw ia kane ka snem kaba kyrpang jongka Hima.
Phi don ban ong eiei?