Shillong:Ka Sorkar Jylla kum shi bynta ban kyntiew ia ka kam jngohkai ha ka Jylla, ka la rai ban thied jaka haduh 50 acre ha Nongmahir, Ribhoi District bad ka jingpynlut kan long haduh T.10 klur.
U Myntri Rangbah ka Jylla u Conrad Kongal Sangma, u la ong ba katei ka jaka ba ka Sorkar thmu ban thied ka long na ka bynta ban kyntiew ia ka jngohkai, ha kaba yn shna ia ki resort bad kiwei ki jingpynitynnat nalor ka jingitynnat ba katei ka jaka ka la don lypa.
Kawei pat ka rai ba ka Sorkar ka la shim ka long ban pyndam noh ia ka Rajat Lal University Act, 2011 bad kane ka jingpyndam noh ia kane ka aiñ ka long ba haduh u snem 2020 ia kane ka aiñ khlem ioh satia ka jingmynjur na u Lat ka Jylla namar kiba bun ki daw, bad hadien ba la ioh ia ka muhor na u Lat ha u Rymphang jong u snem 2020, haduh mynta kam don ka jingpyni dak da katei ka University ban sdang ia ka kam lane ban ai ka jubab kaba hun sha ka Sorkar.
Ha kawei ka liang, u Myntri Rangbah ka Jylla, u la kubur ba ka Jylla ka dang sah shadien, bad kaba donkam mynta ka long kumno ban pynkylla ia kaei kaba ka Jylla ka long.
U la ong ba ka Jylla Meghalaya ka iakynduh shibun ki jingeh bad ha ki 5 snem ba la leit ka Sorkar ka la shim bun ki sienjam ban pynkylla dur ia ka Jylla watla kam long kaba suk.
Kane ka jingkren jong u Conrad kadei halor ka jingpynmih kaiphot jong ka NITI Ayog, kaba pyni ba ka Jylla Meghalaya kadei kawei na ki Jylla ba duk tam ha ri India, kaba bud hadien jong ka Bihar.
Haba kren sha ki lad pathai khubor u Conrad u la ong ba ka Jylla ka don shibun ki jingeh, bad bynrap ba ka Sorkar kan pynshong nongrim bad bishar bha ia ka jingkheiñ jingdiah ba ka NITI Ayog ka la lum, bad da kaba pdiang ia kaei kaba la paw yn lah ban pynkylla sha kaba kham bha, watla kan shim por.
U la ong ban wanrah ia ka jingkylla ka donkam ban sdang naduh kiba rit eh, na ki shnong bad ka jingai jingiarap ia ki nongrep kan long kaba donkam nalor kiwei ki kam kiba lah ban iarap kyntiew ia ka ïoh ka kot. U la ong ruh ba kam long kaba suk pat ban ioh noh ia u soh mynta mynta, hynrei ka Sorkar ka la shim ia ki sienjam kiba donkam bad ki la don ruh ki jingkylla ia kiba yn lah ban kyntiew ia ka Jylla ha ka ïoh ka kot.
ym dei ban kyntiew ia ka jylla. ,hynrei ban kyntiew ia ki heh spah bad. ki barjylla. ba kin myntoi ialade bad ki. bar jylla heh spah bad ban pynlong mraw ia ki trai muluk trai jaka ,nuksa viventa 5star hotels. polo orchid hotel sohra ,jiva resort sohra bad bun kiwei ki wei la long trai lut ki barjylla hakaba wat ki traishnong tang ka shyieng ruh Kim ioh
Ban kyntiew ka khajna bn ioh ai ia ki thliem kjit snam kata ia ki chairman, vice chairman kiba dei ki candidate rem election