5 tarik yn iathir ka SNSBH ia ki 12 mat ka VAB

Shillong, 01 Lber:
Ka Synjuk Ki Nongsynshar Shnong ka Bri u Hynniewtrep (SNSBH) kan sa shong jingialang ha ka 5 tarik Lber ban iakren bad iathir ia ki mat kiba iadei bad ka jingmih na ka jingiakren ba la khot da u Myntri Rangbah u Mukul Sangma ha u bnai ba la dep.
“Ka jingialang kan iakren iathir halor ki 12 tylli ki point ba la phah da ka tnad kam pohiing ka sorkar pdeng kiba dkoh ha ka Village Administration Bill (VAB) ka KHADC”, la ong u chairman ka SNSBH u Dr Werlok Kharshiing haba iakren bad u Rupang ha kane ka sngi Hatmajai.
U Dr Kharshiing u la ong ba ka SNSBH ka la dep ioh ia ki 12 tylli ki mat ba ka tnad Kam Pohiing ka ri ka la pynphai ia ka VAB sha ka sorkar jylla bad bun na ki, kim da dei kiba eh hynrei ki don tang katta katto kiba kham kongsan.
“Ngi la ioh ia ki 12 tylli ki mat ba ka sorkar pdeng ka la pynphai ban bishar biang ia ka VAB ka KHADC. Ki don tang kumba 3 tylli eiei ki mat kiba kham kongsan hynrei kiwei kim da long kiba donkam eh haduh katta katta”, la ong u Dr Kharshiing.
Katkum ka jingiakren bad u Dr Kharshiing, ha katei ka jingialang kaban wan iashim bynta ki nongkitkam shnong kiba dei ki dkhot ka Executive Committee ka SNSBH, kan iakren ia ka jingmih na ka jingiakren bad u Myntri Rangbah ha kaba iadei bad ka jingdawa ban pynlait noh ia ka jingbuh kyndon ia ki nongtrei sorkar ban bat kam shnong, ban pynsangeh ia ka jingtam pud ka MUDA sha jaka ka DistrictCouncil bad kiwei ki kam.