5 sngi shongdum ka Laitryngew

Shillong,12 Jymmang:
Hadien ba ka tnad MeECL ka la weng noh ia ka jingpynlip ding kaba bun bun kynta ha ka jylla, kaba la neh da ki taiew ha kine ki khyndiat sngi ba la dep , pynban ha ki thain nongkyndong i kumba ka jingpynlip ding (load shedding) ka dang bteng.
Ha Sohra ka bording kam thikna shuh ha kine ki sngi ha kaba shiphang shiphang ka meh bad shiphang ka lip, katba ha Laitryngew pat -ka shnong shuwa ban poi sha Sohra  bad ki shnong ba marjan jong ka mynta la san sngi kynthih ki la shongdum, iathuh ki nongshong shnong ha u nongthohkhubor.
Haba ia kren bad u MLA ka Sohra u bah Titos Chyne  halor katei ka jinglip ding ha Sohra,  u la kubur ba ka la don ka jinglip ding kaba khah khah ha Sohra bad la san sngi ha Laitryngew bad ki shnong ba marjan, u bah Titos  u la bitar bad u la pynrem jur ia katei ka jingleh sting  ka tnad MeECL ha kitei ki jaka kiba long ki jaka nongkyndong, “Ha Sohra shiphang shiphang ka meh bad shiphang shiphang ka lip ka la leh thlia shaba palat, ha Laitryngew bad ki shnong ba marjan mynta la san sngi kynthih ki paidbah kim ioh ding” ong u bah Titos Chyne haba ia kren bad u Rupang.
U bah Titos u la ong ruh ba ka long kaba lyngngoh ia ka rukom treikam katei ka tnad ai ding ha ka jylla , ha kaba mynshuwa la kynnoh ba ka jingbym lah ban pynbiang bording ka dei namar ka jingtyrkhong um, hynrei mynta pat wat hadien ba la hap slap ruh ka bording kam pat biang. “ Mynshuwa ki kynnoh bym don bording ba tyrkhong um, hynrei mynta pat wat hadien ba la hap slap, ha Sohra ym pat ioh ding” ong u MLA ka Sohra uba la iathuh ruh ba ki paidbah ha ki thain Sohra ki la mad jingeh ha ka rukom treikam ka tnad MeECL namar ba lada ki ioh pyndonkam ding ruh ka dor jong ka bai ding (Bill) ka long kumjuh bad ka bill kaba ki khlem pyndonkam ding. “ Lada pyndonkam ding ruh ka juh ka bill , lada ym pyndonkam ruh   kumjuh bad lada ym ioh ding kumjuh” pynkut u bah Titos.