5 snem hapdeng ka jingeh mad ka samla na Umtrai, ba shet ka Longkmie Khasi ba sah ha Pune

Nongpoh: Lyngba ka jingtrei shitom ki Pulit Ri Bhoi ha ryngkat ka jingsynranlang ki nongialam ka HYC Umden Circle, kawei ka khynnah ba dang 21 snem ka rta, na ka shnong Umtrai ha Ri Bhoi, ka la ioh ban wanphai biang sha ka iing hadien ba ka la sah kumba 5 snem eiei ha kawei na ki jaka kaba don hapoh ka Nongniah Pune jong ka jylla Maharashtra, kata hadien ba ki la leit shaw noh ia katei ka katei samla na katei ka jaka ba ka shong ka sah.

Haba iadei bad katei ka jingpoi Maharashtra katei ka khynnah, la ong ba ha u snem 2016 ba katei ka khynnah ka dang don 16 snem ka rta, la ialam da ka da kawei ka Longkmie Khasi kaba la tip kyrteng kum ka Kong Wancy Dorphang, kaba la kular hakhmat kiba haiing ba ka jingialam jong ka sha Maharashtra, ka long ban pynleit skul bad ruh ban ri sumar bha ia katei ka khynnah.

Ha kaba nyngkong kiba haiing ki dang ioh ban iakren lyngba ka phun bad katei ka khynnah, hynrei hadien katto katne por kim iohlad shuh ban kren bha, namar ka Kong Wancy Dorphang, kam da ailad ia katei ka khynnah ba kan kren bha bad kiba haiing, ha kaba ki la ioh ban kren tang kumba katto katne sekon, kata ruh tang ban iohsngew ia ka sur, hynrei ym ban iakren bha.
Kiba haiing hasem jong katei ka khynnah, hadien ba ki la iaishah la katto katne por, ki la sngewthuh ba imat lah ban don eiei sha lyndet, dei halor kata ka nongrim kaba la pynlong ia kiba haiing jong katei ka khynnah ba kin ujor noh da ka Ejahar sha ki Pulit ka Ri Bhoi.

Dei ha ka 28 tarik Risaw, ba ki pulit ka Ri-Bhoi kaba la ialam u SI PK Lyngdoh, SI B Khymdeit, WPC O Jala bad u Bah Donbok Maiong President ka HYC Umden Circle, ki la leit ban shaw noh ia katei ka khynnah na ka jaka sah kaba don ha Pune, la lap ba katei ka samla, ka don hapdeng shibun ki jingeh bad ka jingioh ban leit shaw na ka jaka sah katei ka samla, ka dei da ka jingiarap ki Pulit ka jylla Maharashtra.
Haba la ioh ban leit shaw noh ia katei ka samla, bad lyngba ka jingiathuh jong ka, la iohi jingtip ba katei ka Kong Wancy Dorphang, ka la shu kular kai hakhmat kiba haiing ban phah skul ia katei ma samla, da kaba shim kabu namar ba ki dei kiba duk, hynrei ha ka jingshisha hi ma long ha haba katei ka samla ka la poi sha Maharashtra, kam shym la ioh satia ban leit skul.