Nongpoh: Hynnin ka sngi, ka la don ka jingjied ban pynthymmai ia ki nongialam shnong jong 6 tylli ki shnong kiba hap hapoh ka Umsning Town Durbar (UTD) bad ha katei ka jingjied thymmai ia ki rangbah shnong ha kitei ki 6 shnong, 5 ngut ki dang neh hi kiba barim, hynrei tang ha shnong Umsning Patarim, la mih bujli da uwei pat.
Haba phai sha katei ka jingjieh ban pynthymmai ia ki Rangbah shnong ha kitei ki 6 shnong, dei tang u Bah Babul Ryntathiang, uba dei u rangbah shnong ba thymmai na Umsning Patarim, lait nangta baroh ki dei hi kiba rim, ha kaba na Umsning Proper-B dang neh hi u Bah Rocky Augustine Marwein, na Umsning Lum Umpih la jop da u Bah Benedict R Syngkli, na Umsning Proper-A la jop da u Bah Ritstar Khonghat, u Bah Melkhisedek Mawlong na Lumroman bad u Bah Shanbha Sohtun na shnong Umsohlang.
Ha katei ka jingjied ban pynthymmai ia kitei ki Rangbah Shnong, kiba hap hapoh ka Umsning Town Durbar na bynta ka samoi treikam jong ki kaba san 5, la pyniaid da ka Election Committee, kaba la khlieh da u Bah Rocky Kylla kum u Chairman, ha ryngkat ka jingdon ruh u Bah K. Langstieh Myntri ka Hima Mylliem, u Pa’iem B.S Syiem, Syiem Khynnah ka Raid Mawbuh, u Bah Anthony Makdoh Chairman ka Umsning Town Durbar lem bad shibun kiwei ki riew rangbah katei ka thain.
Phi don ban ong eiei?