Shillong: Ki dkhot ka HYC Pahammawlein Unit, hynnin ka miet ki la ioh ban bat ia 5 ngut ki bar jylla, kiba la thmu ban rungtuh sha ka jylla, kata khlem da iaid lyngba ka COVID-19 Screening Centre bad kumjuh ruh na ka Infiltration Check Gate kiba don ha Byrnihat.
Ia kitei bar jylla, ki dkhot ka HYC ki la ioh ban bat ha Toll Gate kaba don ha shnong Pahammawlein 20Mer, namar ki la ioh jingtip ba kitei ki bar jylla, ki la shu rungtuh sha ka jylla, khlem da don ia ki kot ki sla kiba biang. Halor katei ka jingiohbat bar jylla, u Bah Jayson Lennox Nongrum, General Secretary ka HYC ha Ri Bhoi, u la ong ba ki dkhot ka seng tang mar ia tip halor katei ka jingthmu kitei ki bar jylla ban rungtuh sha ka jylla, ki la pynapshrip ha katei ka jaka bad ki la ioh syndon ban bat ia kitei ki bar jylla.
U la iathuh ruh ba kitei ki bar jylla ki dei kiba shalak bha, namar haba ki la poi ha Byrnihat, ki leh kum ki trai shnong bad kiba la tip bha, ha kaba tang shu poi ha Byrnihat, ki da shimwai da ki Auto Rickshaw khnang ban lait na ka Screening Centre bad Infiltration, hynrei haba ki la lait na katei ka jaka, ki sa shong da kiwei pat ki kali bad ki ban sa pynpoi ia ki sha ka jaka kaba ki thmu.
Haba iadei bad kitei ki bar jylla kiba la ioh bat na Pahammawlein, ki dkhot ka HYC ki la leit ban aiti noh sha ki Pulit ka Infiltration, khnang ba kin ioh ban leh ia kaba donkam baroh bad hadien ka jingtohkit ki Pulit ki la pynphai dien trai noh ia kitei ki bar jylla, namar la lap ba kim don ia ki kot ki sla kiba biang.
Phi don ban ong eiei?