5 ngut iasoh BJP ki MDC, kynthup na ka Congress bad NCP

Shillong, 06 Naiwieng:
San ngut ki MDC kynthup uwei na KHADC bad saw ngut na GHADC ki la pyniasoh bad ka BJP ha kane ka sngi Saitjain ba kynthup ia u Bah Neil Antonio War u MDC ba phet noh na ka Congress na Laitumkhrah jong ka KHADC, bad saw ngut kynthup u Ismail R Marak u MDC shimet uba dei u MLA barim bad u briew ba iajan bad u Myntri Rangbah u Dr Mukul Sangma.
Kiba iasoh bad ka BJP ki kynthup ruh ia u Khorus Marak, Righteous Sangma uba dei u MDC ka NCP, u Seiful Rehman u MDC shimet bad u bah Field Marshal Mawphniang u MDC barim na Umroi.
Kane ka jingiasoh jongki, ka long ka rekod ia kane ka party kaba wan suhthied ha kane ka jylla khamtam ha KHADC ka bym don MDC mynno mynno ruh.
“Ka dei ka sngi sahkynmaw ia ka party ha kane ka jylla, ngi la pdiang ia ki MDC ba la wan ban iasoh bad ngi kynthup ha GHADC bad KHADC. Ngin pdiang shuh shuh lada don kiwei kiba kwah ban wan iasoh bad ka party”, la ong u President ka BJP u Bah Shibun Lyngdoh haba pdiang burom ia kine ki MDC ha ka jingialang ha kane ka sngi Saitjain.
Katba u Nalin Kohli u nongialam ka BJP ba peit ia ka Meghalaya, u la ong ba ka jingwan pyniasoh jong kine ki MDC, ka dei shi bynta na ka jingpyniar ia ka party kaba ngeit bad treikam ha ka lynti Sab ka sat sab ka vikas (ka roi ka par ia baroh).
U la pynpaw ia ka jingsngew shngain ba ka party kan sa thaw ia ka sorkar ha kane ka jylla Meghalaya ha u snem 2018. “Ka daw ka jingkyntait ki paidbah ia ka Congress ka dei namar ba ka roi ka par ha kti ka Congress ka la sangeh kumba sangeh. Ka roi ka par ka dei kaba kongsan tam ia ki paidbah”, u la ong.
U la ong ba namar ba ki paidbah ki la ngiah ka Congress ka la pyrshang dohiap ban leh da ka bor kumba ka paw ka jingiakhun hapdeng u CEM ka KHADC u Bah Pynshngain N Syiem bad u Myntri Rangbah u Dr Mukul Sangma.
“Ki paidbah ki la ngiah ia ka Congress bad ka paw shai ba wat ha ka ktem jong u Myntri Rangbah, u kyrtong ka Congress u la shah rem ha kane ka elekshon MDC bad MP”, la ong u Kohli.
Ka la dei ia baroh ki paidbah kynthup ki seng sain pyrthei, ki seng, ki kynhun, bad ki riew shimet ban treilang shrup ban ai jingsneng kaba tyngeh ia ka Congress ha kane ka jylla, la bynrap u Kohli.