Shillong: U Myntri Rangbah u Conrad K Sangma un sa bam smai hadien ba iehnoh kam kum u MP ka Lok Sabha. Hadien ba la jop ia ka MLA na South Tura, un hap ban iehnoh ia ka Lok Sabha, khnang ba un bteng ia ka kam myntri rangbah.
Katkum ka khubor, u Conrad un sa bam smai ia ka jinglong MLA ha ka 5 tarik Nailur hadien ba u la iehnoh kam MP.
U Conrad um lah ban bam smai lang bad u Bah Pius Marwein ha kine ka sngi ba la dep namar ba um pat iehnoh jinglong MP.
U Bah Pius uba la jop MLA na Ranikor na ka UDP u la shah pynbam smai ha u Lamphang ka iing dorbar u Dr Donkupar Roy ha ka sngi Palei ba la dep.
U Conrad bad u Bah Pius ki la shah jied MLA ha kane ka iing dorbar kaba shiphew ka jylla.
U Bah Pius u la jop da kaba pylliem ia u Martin M Danggo ka NPP na Ranikor katba u Conrad u la pylliem ia ka kyrtong ka Congress ka Charlotte W. Momin na South Tura. U Conrad u la jop 8,421 vote katba u Bah Pius u pylliem ia u Danggo da 2,896 vote.
U Bah Pius u la khur 13,183 vote katba u Danggo u ioh 10,287 vote. U Conrad un hap ban aiti ia ka shithi iehnoh MP sha ka Lamphang ka Lok Sabha ka Sumitra Mahajan.