5 kali ki khar Assam, ki hiar thma ia ki Khasi ha Umran

Shillong,9 Risaw:
Ha ka 5 tarik mynta u bnai ha ka por 12:30 baje mynstep , ki khar Assam ki la hiar thma kynsan ia ki khasi khlem da don daw eiei. Katei ka jingjia ka la jia ha ka jaka kaba don hapdeng ka shnong Nongthymmai bad ka shnong Umran-Ri-Bhoi District. Ki la don haduh 5 kali ki khar Assam kiba la hiar thma ia ki khasi bad kitei ki shong ha ka Bolero Pick Up kaba don ia u nombar AS25BC-9830, AS01GC-8701, AS01EC-0969, AS01GC-4340 bad sa kawei kaba ym lah ban ithuh nombar.
Ha katei ka sngi kitei ki khar Assam ki la khang lynti kynsan ia kawei ka kali ba shong ki Khasi kaba don ia u nombar ML-05L-0495 bad tang mar ia hiar ki la bom naphang bad kali bad briew,hynrei ha katei ka jingjia ki briew kiba shong ha katei ka kali ki shu mynsaw bad ki lait im da ka said. Ki briew kiba don hapoh katei ka kali kaba la shah hiar thma ki dei ki nongtrei jong ka Meda Infrastructure bad uwei na kiba don ha katei ka kali u dei uba la tip kyrteng kum u Shandarson Nongrem, utei u la mynsaw jur bad la pynkit noh sha Civil Hospital, Nongpoh ban shah sumar.
Tang mar ia lait phet na katei ka ijngshah thombor, ki khasi kiba don ha katei ka kali ki mareh wut wut sha Nongpoh Police Station ban pyntip pulit ia katei ka jingjia, hadien kumba katto katne por ki pulit ka Nongpoh ki la ioh bat ia kitei ki kali bad ia ki briew. Hynrei la ong ba kham hadien ki pulit ki la pyllait noh ia kitei ki briew bad ki la bat pynban ia ki nongwan ujor kumjuh ruh ia ka kali. U bah Bahunlang Sanglyne Basan u HR Administration ka Meda Infrastructure u la ujor sha ki pulit halor katei ka jingjia ,hynrei u la pynpaw ka jinglyngngoh kumno ki pulit ki pyllait noh ia kitei ki briew khlem da aiti ia katei ka kam sha ki pulit ka Umsning Out post,namar ba katei ka jingjia ka hap hapoh ka jingpeit ka Umsning Outpost.