5 hajar ngut yn hikai ai kam ka sorkar pdeng, ong u myntri

Shillong, 8 Rymphang:
U myntri khynnah ka sorkar pdeng ba peit ia ka tnad Micro, Small & Medium Enterprises Giriraj Singh u la ong ba ka sorkar kan buh ia ka jaka hikai ia ki samla kane ka jylla na ka bynta ban pynioh kam haduh san hajar ngut.
Une u myntri uba la wan jngoh ia ka jylla Meghalaya ha kane ka sngi Saitjain, u la ong ba ka sorkar kan buh ia ka jaka hikai na ka bynta ban pyntbit ia ki samla kane ka jylla.
U Giriraj Singh u la ong ba kane ka jaka hikai kan long ban ai ia ka jingtbit ia ki samla bad ki nongseng kam ha kane ka jylla na ka bynta ia ka ioh ka kot bad ka iohkam iohjam.
U la ong ba ka jingai jinghikai kan long ha ki bynta bapher bapher jong ki jait kam.
“Ngi thmu ban pynroi ia ki kam jong ki samla jong kane ka jylla”, u la ong.
U la ong ba ka sorkar kan phai khmat ruh sha ki longkmie ha kaba kan pyntreikam ia ka skhim Charka na ka bynta ban ai kam ia ki longkmie ba kin lah ban ioh kamaiT.5.000 ha ka shi bnai.
Halor ka skhim Prime Minister Employment Generation Programme (PMEGP), u la ong ba ka sorkar ka la buh thong ban pyntreikam 1133 tylli ki projek ka MPEGP ha kane ka jylla Meghalaya bad na kine, 185 tylli la dep mang pisa.
U la ong ba 5111 tylli ki projek la mang ha Assam, bad baroh kawei ka thain North East la mang 13337 tylli ki projek na ka PMEGP.
“Ngan kylli na ki ophisar ka tnad ha kane ka jylla balei kim shym la mang pisa ia ki projek na kane ka skhim”, u la ong.
Ha kane ka jingwan jurip ia ka skhim Prime Minister’s Employment Generation Programme (PMEGP) u myntri u la iakynduh ia ki ophisar ka tnad Commerce and Industries department ka jylla.