Shillong: U Chairman ka Khasi Hills Autonomous District Council (KHADC) u Bah Teinwel Dkhar u la ong ba ha kane ka Executive Committee (EC) ba ialam da u Bah HS Shylla kum u Chief Executive Member (CEM), ka la leh shibun ki kam tang hapoh san bnai bad ka don ka jingiapher bak ly bak haba ianujor bad ka EC ba ialam da u Bah PN Syiem, kaba don slem ha ka bor hynrei kam lah wat tang kawei ruh ka Bill.
Haba kren ha kane ka sngi Palei, kaba dei ka sngi kut ka dorbar tlang ka KHADC, u Bah Teinwel uba la shimti ia ka kam chairman ha ka 24-07, u la ong, “Ha kane ka jinglong chairman jong nga bad ka CEM u bah HS Shylla, lah ioh shibun ban pyndep ia ki kam ha ka Council. La lah ban wanrah bad ban pas haduh 8 tylli ki bill, tang ha kane ka Dorbar tlang ha ka por ba lyngkot”.
U la ong ban ianujor bad ka EC ba ialam da u Bah PN Syiem, ka iapher bah bak ly bak.
“Ha kane ka samoi san snem, dei tang ha ka por u bah Shylla, ba la wanrah ia ki bill, ha ka por u bah PN Syiem ym don eiei kaba wanrah tang iwei i bill ruh ba donkam”, la ong u Bah Teinwel.
U Bah Teinwel u la ong ba ki don kumba 30 tylli ki bill, ba la phah sha u Lat bad don kiba la pynphai hynrei u CEM barim u bah PN Syiem um leh eiei bad dei ha kane ka por ba long CEM u Bah Shylla, ba la lah ban pynshai bad ban phai biang ia ki katto katne ki bill.
U bah Teinwel u dei u MDC na Shella, uba la jop lai sien na ka UDP bad u dei ruh u chairman ba 24 jong ka KHADC naduh ba sdang ha u snem 1952 haduh mynta.
U la ong ba ka long kaba kham sah kynmaw ha kane ka jinglong chairman jongu, namar ba tang ha ka por kaba lyngkot la lah ban pynlong ia ka dorbar kyrpang ruh, nalor ka dorbar kaba ju long.
Ka MDC elekshon ha kane ka jylla, ka lah ban long biang ha u Rymphang ban wan lashem snem 2019.
Lah ban kdew ba ka dorbar tlang jong ka iing dorbar jong ka KHADC kaba kut hynnin ka sngi hadien lai sngi lynter, kala pdiang 8 tylli ki Bill.
Ki Bill kiba la pynlait da ka iing dorbar jong ka KHADC mynta ka sngi ki long, ka jingpynkylla neAmendment ha kaba iadei bad ka Hima Mylliem, ka Bill ka Hima Khyrim, Mawmluh Sirdarship, ka Wahlong Sirdarship, ka Mawlong Sirdarship bad ka Sohbar Sirdarship kine ki dei ki bill kiba ia dei bad ki hima, ka Khasi Hills Autonomous District Council (Constitution and the Procedure and Conduct of Business) Rules, 2018 bad ka Khasi Hills Autonomous District (Khasi Social Custom of Clan Administration) Bill, 2018.
Kiwei pat kiba la pdiang ka iing dorbar ki long ka Mawdon Sirdarship, Hima Malai Sohmat Syiemship, ka Nobosohphoh Syiemship.