Shillong:Ka Hill Farmer Union (HFU) ka la iawer ia ki nongrep ka jylla ba kin iawan paidbah ha Iewduh ka 4 tarik mynta u bnai ha ka por 9 baje mynstep na ka bynta ban ioh jingtip dalade halor ka jingpyntip paidbah ia ka hukum jong u Syiem ka Hima Mylliem bad ka Dorbar ha kaba iadei bad ka jingot kilo.
Katkum ka kyrwoh khubor na u Bah Commander Shangpliang President jong ka Hill Farmer’s Union (HFU), u la iathuh ba hadien ka jingkyrpad jong ka seng ban pynmih da ka hukum ha kaba iadei bad ka jingot kilo be-ain ia ki jhur ha Iewduh u Syiem bad ka Dorbar ki la mynjur bad pynmih ia ka hukum, kumta ka seng ka ai khublei halor kane.
U bah Commander Shangpliang u la iathuh ba, na ka liang jong u Syiem bad ka Dorbar kin pyntip paidbah ia kane ka hukum kaba la mana ban ot kilo ha ka 4 tarik mynta u bnai ha Iew Dielang (jhur) Iewduh, kumta ka seng ka kyrpad ia baroh ki nongrep kiba ju leit die jhur ha iew ba kin wan ha katei ka sngi khnang ba ki lah ban iohsngew dalade halor kane ka hukum bad khamtam ban ioh copy ia kane ka hukum ba la pynmih da u Syiem ka Hima Mylliem bad ka Dorbar.
Na ka liang jong u bah Commander Shangpliang u la kyntu ia ki nongkhaii ba kim dei shuh ban ot kilo ia ki mar rep namar ka long kaba be-ain. U la ong ba dei ban thew biang ia ka khoh, shang lane ka byrni ba thep ia ki mar rep bad sa ot kilo katkum ka jingkhia jongki. U la kyntu ia ki nongrep ban phone ha u number 8837287374/8974071503 na ka bynta kino kino ki jingeh ba ki nongrep ki iakynduh.