4ngut kiba shah kem, dei kiba na Ribhoi bad kiba thmu pynbthei bom ha Shillong & Nongpoh

Shillong: Ki pulit ka Ribhoi, ha ka jingpynmih khubor, mynta ka sngi, ki iathuh, ba hynnin ha ka por 6baje janmiet, ki la ioh bat ia ka bolero pick up, kaba don ia u number ML 12 3243, ha ka surok Umsning Mawhati, ha kaba la niah, da U Damanbha Ripnar bad na katei ka kali, la ioh kurup, ia uwei u IED.

Kat haduh ba thoh ia kane ka khubor, ki pulit, ki la ioh kem ruh ia 4ngut, ki dkhot jong ka HNLC, kiba la tip kum ki sleeper cell, kiba don jingthmu ban pynbthei bom IED ha Shillong bad ha Nongpoh, ha kaba la bthah ia ki ban leh kumta da kito kiba na Bangladesh.

Kiba shah kem, ki long U Damanbha Ripnar, uba la ju khot sin, U Shall Lapang, nangta sa u Robinis Ripnar, U Jill Tariang, U Shining Nongrum, kiba dei ki nongshong shnong jong ka Ribhoi District. Na kitei, la ioh kurup ia 15 tylli ki gelatin stick, 167 tylli ki splinter, 1 u fuse wire, 3 tylli ki non electric detonator, kawei ka kali pick up bad 5 tylli ki mobile phone.