4hajar tylli ki syrnod thok, kurup ki pulit CID na CMJ University

Shillong, 26 Naitung:
Ki pulit na ka tnad CID (Criminal Investigation Department) ka jylla ki la ioh kurup syrnod thok ba dei jong ka kyrdan PhD, ba la buhrieh ha ka kamra jong ka CMJ University kaba don ha Laitumkhrah, Shillong ha kane ka sngi Thohdieng.
Kumba 4000 tylli ki syrnod thok ba la dep shon la ioh kurup na kamra ba buhrieh la ioh kurup na kane ka university, la ong u heh ka tnad CID.
Kine ki syrnod thok ki dei halor ki sobjek Phd ba dei jong ki nongialehkai ka Gujarat. Ki pulit ka CID ki la ong ba kumba 6000 tylli kiwei ki jingpule (theses) ha ka PhD la buh ha kane ka university kaba don ha Jorabad kaba don markhap hapdeng ka jylla Meghalaya bad ka Assam, la ioh kurup.
Kine ki sobjek ki dei ha ka jingpule ba iadei bad ka gynaecology, pharceutical, physical education, education, commerce bad kiwei ki sobjek kyllum, la ong ka tnad CID.
Ki pulit CID ki la suba jur ba kine ki syrnod thok kaba ioh kurup la shon ha kawei na ki jaka kaba don ha sor Kolkata haba bishar ia ka jinglong bad ka rukom shna ia ki.
Lah ban kdew ba ka CMJ University ka la shah takrain ha u Lat barim ka jylla u RS Mooshahary uba la kyndang hadien ba la lap ia ka jingbym iaid bad bym biang ka jingtreikam kane ka university. U Lat barim u la dep ujor FIR pyrshah ruh ia kane ka university halor ka jingkynnoh ba ka la sam syrnod thok sha ki samla, kaba long kaba beain.
U Mooshahary uba dei ruh kum u visitor jong kane ka university, u la kynnoh ba kane ka university ka la pynkhein ia ki kyndon jong ka UGC bad bun kiwei ha ka rukom treikam jongka.
U la ai jingmut sha ka sorkar jylla ba dei ban pynwai noh ia kane ka university bad mynta kane ka kam ka dang sah teng haba ka bor pyniaid kane ka university ka la iakhun pyrshah ha ka Kashari.
Katba bun kiwei kynthup naduh u director, u registrar ki la shah kem hynrei u khaheh uba dei u Chancellor kane ka university, u CM Jha um pat shah kem satia namar ba u la phet rieh.
U Jha lyngba u nongiasaid ain jongu,u la pan jamin na ka Kashari High Court hynrei ka la kyntait bad u la leit pan noh sha ka Supreme Court bad dang shen ka Supreme Court ka la ong ba u Jha u dei ban leit aiti ha ki pulit bad dei ban ai jamin ia u.