4994 ngut ki khynnah ioh bai bam Border Area

Shillong 15 Nailur:
Da ki phew hajar ngut ki khynnah pule naduh klas XI haduh post Graduate hynrei ka jing don jong ki khynnah bad ki samla pule kiba ioh ia ka bai bam border Area ki dang duna bha.
Katkum ka recod ba la ioh na ka tnad Border Area jong u snem 2012-2013 baroh ki samla pule kiba ioh bai bam na ka thain khappud ki don tang 4994 ngut.
Napdeng 4994 ngut ki samla pule 254 ngut ki khynnah kiba pule shabar ki ioh ia kane ka bai bam na ka sorkar katba 4740 ngut kidei ki samla kiba pule ha ki skul bad ki kolej bapher bapher ba don ha kane ka jylla bad ha kiwei ki jaka pule.
Ka Sorkar lyngba ka tnad border Area ka aiti ia ka pisa sha ka tnad ka pule puthi ba kan sam ia katei ka bai bam jong ki khynnah sha ki skul bad ki kolej bapher bapher.
Katkum ka recod ba la ioh na ka tnad ka pule puthi ka jingsam ia ka bai bam la pynshong nongrim bad pyniapher katkum ka kyrdan ba ki samla pule ki ioh.
Na bynta ki khynnah ki ba ioh ia ka kyrdan 1st Division ki ioh T.2400 shi snem kaba long T.200 shi bnai, ki ba poi ha ka 2nd Division ki ioh T.1200 shi snem kaba long T.100 shi bnai bad kiba poi ha ka kyrdan kaba 3rd Division ki ioh T.600 shi snem kaba mut T.50 shi bnai.
Katkum ka jingtip kane ka bai bam ba ka sorkar ka ai ka long kaba rit than bad kaba la neh la katto katne snem khlem da pynkiew ne pynthymmai shuh.
Na ka liang ka tnad puthi la iathuh ba ladep phah jingthoh sha ka sorkar ba kan p[ynkiew ia ka bai bam ki khynnah pule bad ki samla kiba dei na ka thain khappud jong ka jylla. Hynrei haduh mynta na ka liang ka sorkar kam shym lah leh eiei ban pynkiew ia ka bai bam jong ki khynnah namar ba kumba long mynta ka dor kaba ki ai ka long kaba rit bad kam da long kaba myntoi than.
Katkum ka kyndon jong ka sorkar pdeng, ia ki shnong ne ki jaka kiba hap hapoh ka jing jngai 10 km na suin sha khappud la khein lane la pynhap kum ki shnong kiba hap hapoh khappud.