48kynta byrngem pakhang shnong ka HNLC, na ka ain Rangbah Shnong

Shillong, 22 Jymmang:
Ka HNLC ka la byrngem ba kan khot da ka pakhang shnong kaba 48 kynta ka ban sdang naduh ka miet 26 tarik ha ka por 6 baje janmiet haduh ka 6 baje janmiet jong ka 28 tarik, lada ka sorkar kam lah ban leh eiei halor ka mat kaba iadei bad ka jingshah sloit bor ki Rangbah Shnong. Ka HNLC ka la ai por haduh ka 25 tarik ia ka sorkar ban leh eiei halor ka kam kaba iadei bad ki Rangbah Shnong. Ha katei ka pakhang shnong ka la pynbna ba kan pyllait tang ia ki jaka sumar, ki kali kit nongpang, ki kot khubor bad ki jinglehniam.
Ha ka kyrwoh ba la pyllait paidbah da u bah Sainkupar Nongtraw Publicity Secretary katei ka seng , u la ong ba ka HNLC ka kyrshan ia ka Synjuk Ki Rangbah Shnong, ki Syiem, ki doloi bad kiwei pat ki kynhun kiba ia khih ban pynbor ia ka sorkar ba kan mynjur noh ia ka Vilage Administration Bill. Katei ka seng ka la khot ruh ia baroh ki Khlieh nongsynshar bad ki paidbah ba kin kyrshan ia ka jingsha thngan khlem pud u bah Adelbert Nongrum.
Halor ka jingkynkyntait ka sorkar ban mynjur ia ka VAB da kaba ai daw ba kam biang, ka HNLC ha ka kyrwoh ka la ong ba wat ka riti synshar ka ri India ruh dang hap ban pynkylla da ki spah sien namar ba kam biang, kumjuh ruh lah ban pynkylla ia ki mat kiba donkam ia ka VAB, ka la ong. Ha kaba iadei pat ka jingshah sloit bor ki Rangbah Shnong namar ki kam tait shnong , ki kam bamsap bad kiwei ka la ong ba ki don ki dorbar Shnong kiba bat ia ka bor bad ki lah ban pynkdiah noh ia ka bor uta u briew uba leh ia ki kam bymman hynrei kam dei pat ban shah ktah salonsar.
Ka la kynthoh ruh halor ka ingiapynkhyllem shuki ha KHADC hakaba ka la ong ba ki MDC kyntiap seng ki dei shisha ma ki, kita ki ingkhong shyllang mat bad ki la dei ban sngew lehrain ialade, ka la ong. Halor ka jingiapynkhyllem shuki ha KHADC ka la kynnoh ba ka dei ka buit jong ka sorkar Congress kaba bunkam ha katei ka mat ban ia ka mat kaba iadei bad ka jingeh ki paidbah. Ka HNLC ka la pynrem ruh halor ka jingshah kem ki 2 ngut ba la kynnoh ba ki dei ki dkhot ka HNLC, u Ruskin Phawa u tymmen ba la 55 snem bad u Joh Fiscer Lyngkhoi , ha kaba ka la ong ba ki pulit ki nang ai ding shuh shuh da kaba kem ia ki briew kiba lui lui.