Thmu pynjah burom u bah Pynshngain, ong U Bah Pyniaid: U Bah Pyniaid um pat sngewthuh ba u dang thymmai: Pynshngain

Shillong: U Deputy Chief Executive Member (Dy. CEM) ka KHADC u bah Pyniaid Sing Syiem u la kynnoh ba u bah Pynshngain N Syiem uba long u chairman ka Council, u thmu ban pynjah burom ia ka Executive Committee (EC), da ka jinghukum  jongu ba ka EC ka dei ban pynbiang bha ia ki jubab hapoh ka iing dorbar.

Haba kren mynta ka sngi sha ki lad pathai khubor, u bah Pyniaid u la kynnoh ba u bah Pynshngain u la leh ia kane tang namar ba u kwah ban pyni sha ki paidbah ba kane ka EC ka dei kaba tlot namar ba u kwah shuki CEM.

“Ka jingleh u chairman ka long ba u kwah ban pyni sha ki paidbah ba ka EC ka dei kaba tlot namar ba u kwah ia ka shuki CEM”, la kynnoh u bah Pyniaid.

Lah ban kdew ba ha ka sngi shong dorbar ha ka 25 tarik, u bah Pynshngain u la bthah ia ka EC ba ialam da u bah Teinwel  Dkhar ban pynbiang ban pynkhreh bha ia ki jubab ba la kylli ki dkhot ka liangpyrshah.

U bah Pyniaid u la ong ba kam don kano kano ka jingjubab haba wanrah ia ki jingkylli lait noh tang ki katto katne kiba donkam ban ioh ia ka jingtip kaba thikna namar ban shu ai jubab ia bym thikna, ka long kumba ialam bakla ia ka iing dorbar bad ia ki paidbah.

U bah Pyniaid u la ong ba la dep ban ujor pyrshah ia u bah Pynshngain sha ka party kynthup sha ka NPP, UDP.

Katba u bah Pynshngain N Syiem u la ong ba u Deputy CEM u bah Pyniaid Sing Syiem u dang long thymmai bad um pat sngewthuh ia ka kam jong u Chairman.Katei ka jingkren u bah Pynshngain ka dei halor ka jingkynthoh jong u bah Pyniaid ia ka jingshah kynthoh ka EC ha u Chairman ha ka dorbar mang tyngka namar ka jingbym lah ban jubab ia ki jingkylli.

“Ban pyniaid ia ka dorbar ha kaba kut ka dei ka jingkitkhlieh jong nga u Chairman”, u la ong.

U bah Pynshngain u la pynpaw ruh ka jingbym sngew iahap ba la ujor ia u sha ki Party bapher ka liang synshar bad u la ong ba dei ban pynbeit shuwa hapoh ka Party NPP shuwa ban poi shata.

Shuh shuh u CEM barim ka KHADC u la ong ba u Dy.CEM u dei ban pynleit jingmut ha ki ishu kiba pynmyntoi ia u paidbah, ym ban thaw ishu ia ka jingbthah jong u ia ka EC ban leh home work.