4,800 tynrai ki dieng, leit jynrat naphang ki Karbi na Lapangap

Shillong:Ka shnong Lapangap kaba hap hapoh ka West Jaintia Hills District, kaba hap ha Nartiang konstitwensi, ka la pyr shah ia ki jaitbynriew Karbi, kiba dei na ka jylla Assam, kiba la wan ban phut jubor ia ki tynrai dieng ba la thung, da ka dorbar shnong Lapangap.

Kane ka jing wan kam trai ki Karbi ia katei ka jaka, ka dei namar kim don jaka ban rep ban riang, namar ki iohi ba ka shnong Lapangap ka don ia shibun ki jaka ban thung ban rep.
Ka shnong ka la dep ban thung haduh palat 50 hajar tylli ki tynrai dieng, kaba ki la thung ha ka 5 tarik u jylliew 2023, kaba dei ruh ka sngi pynneh pynsah ia ka mariang kaba la ai da ka Basin jong ka sorkar jylla.

Ha ka jingiakren bad U Secretary jong ka Shnong Lapangap, u bah Monbha Pyrphet, hynnin ka nohphai sngi, ka 30 tarik u nailar 2023, u la iathuh ba ki jaitbynriew Karbi, ki la wan phut ia kine ki tynrai dieng nyngkong, ka dei ha ka 12 tarik u jylliew 2023 kumba 800 tam tynrai eiei bad ha ka 18 tarik jong mynta u bnai nailar ki Karbi ha ryngkat bad ka seng Karbi Student Association (KSA), ki la phut palat haduh 4 hajar tam eiei ki tynrai dieng. Da kane la jingleh jong ki Karbi ka la pynlong ia katei ka jaka ban nym shngaiñ shuh bad ka sorkar jylla Meghalaya bad ka sorkar Assam ki la phah pulit ban pahara ha katei ka jaka.

Na ka liang ka shnong hi, ka kren shai, ba lada ki jaitbynriew Karbi ki dang wan biang ban phut ia ki tynrai dieng, kin nym ai lad shuh ba kin wan pynjulor ia ka jaka thung jaka tep jongki, namar kato ka jaka ka dang dei hi ka jong ka shnong Lapangap, la ong u bah Monbha Pyrphet.
U la iathuh ruh ba wat la ki lum ba don kham shaneng jong ka jaka ba ki thung ia ki tynrai dieng, ba la shah kam trai ha ka sorkar Assam bad ba ka sorkar Assam ka la dep ruh ban shna surok kaba dei jong ka shnong Lapangap, hynrei ki kyrmen ba kine ki jaka ba wan kam ki Karbi kin hap beit hapoh ka jylla Meghalaya, ynda la pynbeit ia u pud u sam hapdeng ka Meghalaya bad ka Assam, namar ki kot ki sla, ki biang lut, ong u bah Monbha.

Ka jingshah kam trai noh jong kane ka jaka ba la shna surok da ka sorkar Assam, ka dei ba ka sorkar Meghalaya kam shem la leh eiei, hadien ba ka shnong ka la dep ban pyntip, kumta katei ka jaka ba don surok, la ioh noh ka Assam.