Shillong:Ka Wildlife and Environment Protection Group, ka la phah shithi sha U Conrad Sangma, myntri rangbah ka Jylla, hynnin ka sngi ha kaba ka kynnoh ba ka don ka jing kit tuh ia u dewiong lyngba ki surok bah NH 40,44 bad NH 6 bad la kynnoh ba katei ka jingkit dewiong tuh, ka iaid beit iaid ryntih, khlem ka jingpeit ka sorkar Jylla.
La kynnoh ruh ba ka sorkar Jylla, ka la thok wat ia ka Supreme Court, da kaba ka ai ia ka jingtip kaba thok halor ka jingdon jong u dewiong, uba la dep sei na ki par bad la kynnoh ba ka tnat mar poh khyndew, ka tnat khlaw bad ki bor District ruh kim shym la trei hok satia ia la ka jong ka kam.
Katei ka seng, ka ong ba man ka sngi, ki don 130 tylli ki trok kit dewiong, kiba shalan dewiong sha ki karkhana dewbilat ha East Jaintia Hills bad nangta la iathuh shuh shuh ba ki don 200tylli ki trok, kiba kit dewiong bad kiba iaid na ki khyrdop thew jong ka sorkar ha Ratacherra jong ka East Jaintia Hills bad la ong shuh shuh ba ha Shangbangla, ha Ri Bhoi District, ki don 150 tylli ki trok kiba iaid na ka khyrdop thew kaba don ha katei ka jaka bad katei ka pyni ba ka don ka jingiadei jong ki nongtrei ha katei ka khyrdop thew bad ki nongkit beain ia u dewiong.
Na ka jingthew la lap ba u dewiong, uba iaid na kitei ki jaka, u dei uba dang thymmai bad la ong ba ia katei ka jinglap, yn sa leit rah sha ka jingtip jong ka Supreme Court.
Katei ka seng, ka dawa namarkata ban tian bishar ia kitei ki briew sorkar, kiba trei beain ia la ka jong ka kam bad ba dei ban shim jingkhein na ki karkhana dewbilat, halor ka jingioh dewiong jongki sha kitei ki jaka, ong ka kyrwoh na U Ma B Buam, Ma S Laloo bad Ma SL Dkhar.