Shillong: Ki nong niah kali kiba hapoh jong ka shatri jong ja Meghalaya Joint Action Committee of Commercial Vehicles (MJACCV), ki la pynpaw ba kim don jingsngewpher ba lada ka sorkar kan knieh noh ia ki permit kali jong ki.
Haba iakren bad ki lad pathai khubor, u bah Wandonbok Jyrwa, u nongialam jong ka MJACCV u la ong ba lada ka sorkar jylla ka pynduh ia ki permit jong ki kan long ka ba bha, namar ba kin ioh kamai noh da ki kali Private, namar ki kali private kim don khajna kumba don ki kali kamai. Ha ka sngi saitjain jong ka taiew, ka MJACVV ka la rai ba kan bteng biang ia ka jingiakhih kaba tyngeh, ka ban sdang naduh ka sngi nyngkong ka ban neh 48 kynta ban pyrshah ha ka jingkuman jong ka sorkar jylla ha kaba iadei bad ka jingdawa jong ki ban pynhiar dor ia ka petrol bad diesel bad kumjuh ban map noh ia ki khajna ba bun jait ba kum ki nongniah kali ki hap ban siew.
Ha ka jingiakren bad ki lad pathai khubor, na ka liang jong u Chairman jong ka MJACCV u Bah Wandonbok Jyrwa u la ong “Kumba ka sorkar jylla ka dang bteng ka jingkuman ia ka jingdawa jong ngi, ngi la rai ban khot da ka jingiakhih ka ka tyngeh naduh la sngi nyngkong jong ka taiew kata naduh ka 15 tarik mynta u bnai.
U kyntu ia ki paidbah ba kin iasnoh kti lang da kaba kim dei ban sei ia ki kali lymne ki bike ki scooty jong ki sha surok, hynrei ba ki dei ban don sharud ki surok kum ka dak ka jingkyrshan ia ki jingdawa jong ki.
Ka MJACCV ka la rai ruh ba lyngba ka jingiakhih ba neh 48 kynta, lada ka sorkar kam patiaw eiei ia ka jingdawa jong ki, ka MJACCV kan pynlong sa da ka jingshah thngan ha khmat jong ka ophis Secretariat.
“Nga khot nga wer ia baroh ki nongniah kali na ki district bapher bapher jong ka jylla bad wat na Garo Hills ban iasnoh kti lang ha kine ki jingiakhih” bynrap u Bah Jyrwa.
Shuh shuh u Bah Jyrwa u ong ba lada kim lah ban kamai ban pyndap jakpoh ia la ka iing ka sem ka bha ba kin shong shah thngan, syndon wat la ki dei ban iap. U ong ruh ba baroh ki nongniah kali ki ong ba lada ha ka khangdam (lockdown) ki lah ban im khlem kamai haduh lai ne 4 bnai, kam don jingeh ia ki ban shong sa shibnai bad kane kan nym don jingktah eiei ia ki.
Phi don ban ong eiei?