45 tylli ki Karkhana ot dieng ba don laisen, ong u Dr Mukul

Shillong, 21Lber:
U Myntri rangbah ka jylla u la ong ba ki don 45 tylli ki Karkhana ot dieng ha ka jylla baroh kawei kiba ioh license.
Ha ka jingjubab ia ka jingkylli ba wanrah u MLA ka Rambrai u Bah KP Pangniang ha ing dorbar mynta ka sngi, u Dr Mukul u la ong ka sorkar ka la thmu ruh ban buh shuh ia ki iew Karkhana ne industrial estate ha ki sub-division jong ka jylla da kaba iaid katkum ki kyndon ka sorkar pdeng.
U la ong ba ka tnad Environment, Forest & Climate Change ka la phah ia ki kyndon ha kaba iadei bad ki karkhana of dieng ha 11 tarik Naiwieng 2016 sha ka sorkar jylla.
U la ong khnang ban weng ia ki jingeh jong ki nongkyndong, ka sorkar ka la buh ia ki 7 tylli ki karkhana ot dieng ha ka jylla kynthup ka Khliehtyrshi ha West Jaintia hills, ka Umiam, Byrnihat, Nongpoh ha RiBhoi, Mawiaban West Khasi Hills, Tura ha West Garo Hills, bad ha Daugre ha East Garo Hills.
U la ong ruh ba ka sorkar ka la thaw ia ka state level expert committee na ka bynta ki Karkhana dieng ha u Rymphang 2017 katkum ki kyndon ba la bthah da ka sorkar pdeng. Ka komiti kan bishar ruh na ka bynta ban buh ia ki Karkhana dieng ha ki district katkum ki kyndon ka ain, u la ong. U Myntri rangbah u la ong ba ka sorkar ka la bthah ia ki Karkhana dieng ban plie ia ki jaka buh dieng na ka bynta ban plie lad ia ki paidbah ban thied dieng ia ki jingdonkam jongki.