40ngut ki nongbylla khlem laisen bat ka KHADC

Shillong, 11 Nohprah:
Ki pulit Enforcement ka Khasi Hills Autonomous District Council (KHADC) mynta ka sngi, ki la leit ban khynra ia ki nongbylla bar jylla kiba bylla khlem don laisen nongbylla. Ha katei ka jingleit khynra ki Enforcement, ki la ioh bat 40 ngut ki bar jylla na Lower Mawprem bad kitei ki bar jylla ki dei kiba bylla ha ka tnad BPL ka MUDA. Ki pulit KHADC ki la pynsangeh ia ka kam ba kitei ki bar jylla ki trei kat ba kim pat lah ban pynbiang ia ka laisen bylla. Ha ka juh ka por, ha katei ka jingleit khynra, ki pulit KHADC ki la ioh ruh ban khang ia saw tylli ki dukan bar jylla, ki bym don ia ka laisen khaii pateng kiba don ha kajuh katei ka shnong. Ki saw tylli ki dukan bar-jylla kiba la shah khang mynta ka sngi ki dei ka dukan jong U Muzid Talukdar, kaba dei ka dukan suhjain, ka dukan u Dhanraj Upadhya, ka dukan dawai Homeopathic u Anjan Paul bad ka dukan die sha u Shasi Kont Sah.
Ha kane ka taiew ba la dep pat, ki pulit Enforcement hapoh ka jingialam u Inspector bah R.F Lyngkhoi ki la hiar ban khynra laisen khaii sha ki thain jong ka West bad South West Khasi Hills bad kumjuh ruh sha Balat, kiba dei ki jaka ki bym pat ju khynra laisen khaii la kumba 20 snem tam mynta.
Ha katei ka jingleit khynra ki la ioh ban khang 5 tylli ki dukan bar jylla ha Balat, 3 tylli ha Nong Umsur, 3 tylli ha Nongjri bad 3 tylli ha Shahlang. Ha katei ka taiew ba ki pulit Enforcement ki leit ban khang dukan bar-jylla, u bah Lyngkhoi u la iathuh ba don kiba lait ruh, namar ba ha ka por ba ki enforcement ki poi ha katei ka jaka ki don kiba la dep khang hi noh. Haba pynpaw ba tang 3 tylli ki dukan ha ki jaka ba jyllei bha ki bar jylla kum ha Nongjri bad Shahlang, ki pulit ki la ioh ban khang; u la ong ba ka daw ka dei namar ba ki la don bun ki bar jylla kiba leh ia ki kam khaii hangtei ki la dep phet lypa, namar ka jingdait thah ka iew ka Hat hadien ba la shah khang tih dewiong.
U EM ka tnad khaii pateng pat u bah Latiplang Kharkongor u la ong ba ka tnad kan bteng ia kane ka jingkhynra laisen ha kylleng ki jaka tang mar ia mih u snem thymmai, namar ba mynta la mih sa ki sngi shuti. Kumjuh ruh u la ong ba kumba leh ha sor Shillong ka tnad kan khot ruh ia ki Syiem, ki Rangbah shnong , ki sordar bad ia ki khlieh nongsynshar jong ki thain West bad South West Khasi Hills ban pynshai sha ki ba ki dei ban pynduna noh ka ai NOC khaii ia ki bar jylla.