400ngut ki dkhot, buh thong ka BJP, ban jop sha Lok Sabha

Shillong:Ka seng BJP ka la buh thong ban jop 400 ngut na ka 543 ngut ka jingdon ki dkhot ka ïing sha ka Lok Sabha ha ka elekshon mynta u snem 2024.
U nongialam ka BJP uba peit ia ka Meghalaya, u Dr. Chuba Ao, mynhynnin ka sngi, ula ong ba ka Meghalaya ruh kan iakhun tyngeh ban jop ha kane ka elekshon ban wan.

“Ka thong jong ngi mynta ka kynti ka long ban jop 400 ngut ki MP sha ka Lok Sabha”, la ong u Ao.
U Chuba ula ong ba ka jingbym lah ka BJP ban jop bun ki MLA ha ka elekshon kaba la dep, ka dei namar ba ka tlot ban pynkhlain ia ka party sha ki tynrai.
Ula ong ba ka party shi bynta ban pynkhreh ia ka elekshon, kala bthah ia baroh ki nongkitkam, ki dkhot ban leit pynshai pynsngewthuh ia ki skhim ba ka sorkar BJP kala ai sha ki paidbah kum ka skhim ing baduk, ka lyer shet, ka bording, ka um bam bad kiwei khnang ba kin ai ia ka jingkyrshan.

“Ngi la bthah ia baroh ki nongkitkam, ki dkhot ka party ban leit pynshai sha man ki shnong ki tnum ïing ia ki skhim ba ka sorkar pdeng kala ai sha ki briew” , la ong u Ao.

Kine ki skhim kiba la wanrah ka sorkar BJP hapoh ka jingialam u Narendra Modi ki kynthup ia ka skhim ïing baduk, skhim umbam, skhim lyer shet, ka skhim NREGS, nalor kiwei pat.
Katkum ka jingong u Ao, ka party ka la bthah ruh ia ki nongtrei ban iarap ia kito kiba shem jingeh, ki bym ioh ia ka skhim, wat la ki dei hok, wat ban pyniarap ia ki bym don Aadhaar ban ioh ia ka skhim.