Shillong: Ka Hynniewtrep Youths’ Council (HYC) mynta ka sngi ka la lap palat 400 ngut eiei ki dkhar kiba trei bylla kiba trei ka jaka pule Cancer Institute kaba don ha NEIGRIHMS Mawdiangdiang, Shillong. Ia kane ka jaka pule la pyntrei da kawei ka kompeni nabar jylla, ka Larsen & Toubro Ltd. (L&T).
Ka HYC ka la pynlong ia kane ka jingkhynra lyngba ka “Sier Lapalang Operation” ka la lap ba bun na kine ki nongtrei bar Jylla kim don ia ki kot ki sla kiba biang kum ha kaba pynithuh ialade kum u nongshong shnong jong ka Ri India lyngba ka EPIC bad khamtam ïa ka Labour License na ka Khasi Hills Autonomous District Council (KHADC) ia kaba kala pynsuba jur ia ka Seng ba ioh lehse kine ki briew kim dei ki nong India.
“Bun na kine ki nongtrei bar Jylla kim don ia ka EPIC bad kane kala pynsuba ia ka Seng ba kine ki briew kim dei ki nong India”, ong u Bah Roy Kupar Synrem General Secretary haba iakren bad u nongthoh khubor.
U la ong ruh ba kaba sngew lyngngoh ba kine ki bar Jylla kila trei ha katei ka jaka mynta la bun tylli ki bnai, hynrei kim don wat ia ka Labour License kaba ki hap ban ioh napoh District Council bad kane ka pynpaw shai ba ka jingdkoh jong ka KHADC ban pynkhlain ia ki ain ba la don lypa kum ka ain Trading by Non-Tribals ka pynlong ia ki briew ba nabar ban wan trei laitlan ha kane ka Jylla.
Ha kane ka jingleit khynra ka Seng, ka la iakren ruh bad ki bor pyniaid jong ka L&T Ltd bad ai por ruh ia kane ka kompeni hapoh shi taiew ba ka dei ban pynbiang lut ia baroh ki kot ki sla jong ki nongtrei bad dawa ruh ba dei ban pynmih noh shi syndon ia ki bym biang ki kot ki sla.