Shillong: Ka sorkar jylla kam lah ban pynpoi ia ki nongtrei sorkar sha ophis wat la ka la pynmih ia ka jingmaham kaba tyngeh ban nym pep trei mynta ka sngi namar ka pakhang shnong ki sengbhalang ha baroh kawei ka dong mihngi kynthup hangne ha Meghalaya.
Katkum ka jingtip na ka sorkar, ka jingdon jong ki nongtrei sorkar kiba la wan trei ha kane ka sngi ka long tang 40 percent ha East Khasi Hills district kaba dei ka nongbah jong ka jylla. Tang ha Secretariat kiba la wan trei ki la kot sha ka 25 percent.
Katba ha kiwei ki district ym pat ioh jingkhein haduh ba thoh ia kane ka khubor.
Ka North East Students Organisation (NESO) ka la khot pakhang shnong naduh 5am haduh 4pm ha ka dong mihngi baroh kawei ban pyrshah jur ia ka jingthmu pynlong ain ka sorkar pdeng ia ka Citizenship (Amendment) Bill 2016 ban ai ia ka hok nongshong shnong ia ki briew ba sah ha Pakistan, Afghanistan bad Bangladesh kiba dei ki Hindu, Sikhs, Jain, Parsis bad Khristan ban long nongshong shnong ha India.
Ki surok ki ophis, ki iew ki hat bun kila kynjah jar ha kane ka sngi ha baroh kawei ka jylla kynthup ha Garo Hills.
“Ka jingjop ka pakhang shnong ka dei ka jingkyrshan jong ki paidbah ban pyrshah ia ka Citizenship (Amendment) Bill 2016 bad ka sorkar India ka dei ban sngap ia ka sur jong ki paidbah,” la ong u general secretary ka KSU u bah Donald V Thabah.
U la ong ba kin iakhun beit haduh ba ka sorkar kan pyndam noh ia kane ka Bill kaban pyniap duh ia ki jaitbynriew riewlum jong kane ka thain.
Ha ka jingshisha ka sorkar Meghalaya, ka la buh ban shong jingialang cabinet mynta ka sngi hynrei la pynsangeh noh.