40% na ki longkmie kiba dangkha khyllung ha la ki ïing, ong u Sampath

Shillong:Na ka daw ka jingdonkam barabor jong ka jingpynkhie im pat hadien ba la kha ïa I khyllung, ka long kaba kongsan ban ïoh ki jingshah sumar haba ïadei bad katei ka por ba dang shu kha khyllung.

Shuh shuh halor kane, la pynlong ïa ka workshop halor ka nongrim ka jingkha khyllung ne ka prokram neo-natal resuscitation program (NRP)- First Golden Minute (FGM) kaba la long ha ka 10 tarik mynta u bnai, 2021 ha Nazareth Hospital Shillong.

Ïa ka jingai jinghikai la pynlong na ka bynta ki Mid-Level Health Provider (MLHP) jong ka Ayush man Bharat Health & Wellness Centres ha Meghalaya. Ïa katei ka workshop la pynlong da ka Indian Academy of Pediatrics & National Neonatology Forum, hapoh ka jingïatreilang bad ka NHM-Meghalaya- CPHC (Comprehensive Primary Healthcare Programme).

Ha katei ka workshop la pynleit jingmut kyrpang halor ka jingdonkam ka First Golden Minute- Ïa katei kab”Golden Minute” la kdew ha kato ka por 60 second jong ka jingim I khyllung. Ha kine ki por ba khim bha, I khyllung idei ban ring mynsiem dalade lane dei ban don ka jingtuklar kaba khlem da pynslem. Da ka jingai jinghikai pynkha khyllung, ki nong sumar ka Koit ka Khiah ki la khamlong kiba biang ban ithuh ïa ki jingeh ha ka por ba dang kha khyllung bad ban sdang ai jingsumar hapoh ki 60 second. Ka shi minit ka lah ban rai ka jingim bad ka por ban im.

Ha ka workshop, la hikai ïa ki MLHP da ki shemphang ha ka Koit ka Khiah ne ki State Maternal Health expert.
Ki nonghikai ki la ban jur halor ka jingdonkam ka shi kynta ka jingbym pynthut ka Kangaroo Mother Care (KMC) ne ka jingpynïadei kaba marmet hapdeng ka kmie bad I khyllung ba dang kha thymmai.
U Principal Health Secretary, Sampath Kumar, IAS u la shim bynta lang ha ka workshop. Katba dang peit bad ïaid lyngba katei ka workshop bad ki jingai jinghikai, u la ïathuh ba jan 40 pc na ka jingkha khyllung ha Meghalaya ka dang long hapoh ki ïing, kumta ka long kaba kongsan bha ban tip ka dor jong ka First Golden Minute (FGM), ym tang ïa ki nongsumar, hynrei ïa ki paidbah ruh, khamtam ka kmie ba la khmih lynti ban ïoh khyllung.
Kumba la ïathuh da u Principal Health Secretary, ka jingkha khyllung ha ki jaka sumar ka la kiew sha ka 60 percent ha jylla, hadien ka jingplie ïa ka kam pynlait im da ka tnat ka Koit ka Khiah, kaba la buh thong ban ïada ka jingim ki khyllung bad ki kmie.
U la banjur halor ka jingdonkam jong ka jinghikai ka rukom pynkha khun kaba aiti pateng bad ka jingdonkam kiba ai jingsumar ban ïatreilang bad ki ban pynthikna ka jingpynkha khyllung kaba don jingïada ha ki thaiñ nongkyndong bad sha ki jaka ba eh ban poi.