U myntri rangbah ka jylla u Conrad K Sangma un leit ban ia kynduh ia ka sorkar pdeng ha Delhi ha ka 4 tarik u Jymmang na ka bynta ban ia kren ia ka kam ker sainar shiah ha ki khappud bad ka Bangladesh. U Conrad u la pynsngew ha ki nongialam ka Coordination Committee on International Border (CCIB) mynta ka sngi ha ka jingiakynduh jong ki bad u ban ia kren halor ka kam ker sainar shiah kaba dei sha ki thaiñ Dawki.
Ki nongialam ka CCIB hapoh ka jingialam u bah S Myrchiang chairman bad bah K Myrchiang Secretary ki la pynsngew ha u myntri rangbah ia ka jingeh kaba ki paidbah ki ia kynduh namar ka jingbym pynbeit pynbiang ia u pud u sam hapdeng ka India bad ka Bangladesh. Haba kren sha ki nongthohkhubor ki nongialam ka CCIB ki la ong ba kim pyrshah ia ka jingker sainar shiah hynrei ka sorkar ka dei ban pynbeit shuwa ia u pud u sam.
