4 tarik, yn

Shillong, 31 Risaw:
Shipor ka la mih ka jinghuri hura kaba jur hapoh District Council hadien ka jingiehnoh kam u Deputy Chairman ka KHADC u bah Pyniaid Sing Syiem, kaba la bud pat sa ka jingdawa EM na ka seng HSPDP bad katei ka mat ka la pynktha khlieh ia u CEM ka KHADC u bah Adelbert Nongrum, bad u la shim kyrkieh ia ka rai ban pynbna ba yn weng noh ia ka kong Grace Mary Kharpuri na ka thup jong ki EM, hynrei hangtei ruh ka don ka jingbym sngewhun ha u CEM ban weng noh ia ka kong Grace naba ka la byrngem ban weng noh ia ka jingkyrshan jong ka ia ka ARPA, kaba la pynkylla noh ia ka jingmut jingpyrkhat u CEM ban pynrung biang ia ka ha ka thup ki EM.
Kham hadien ban pynthanda ia ka jabieng u CEM kaba thnam, bad shuwa ba u CEM un pynbna sha ki nongthohkhubor, ki lad khubor ki la iathuh ba namarba ym don mano mano ruh uba kloi ban iehnoh ia ka shuki EM, u bah James Ban Basaiawmoit u MDC ka Mawkhar uba dei ruh u EM ba bat ia ka kam Labour dalade hi u la mih shakhmat ban tyra ban iehnoh ia katei ka shuki kaba u don tang ban pynkut noh ia ka kynrum kynram, bad ia katei ka rai ba u bah James Ban un hiar shuki u CEM u la pynbna shuwa ban long ka dorbar Tlang ka KHADC.
Shuh shuh ki tyllong khubor ki la iathuh ba u bah James Ban Basaiawmoit un hiar shuki noh ha ka 4 tarik u naiwieng, kata ha ka sngi hat majai, bad ha ka jaka jong u yn pynrung da uwei pat uba dei u MDC na ka seng HSPDP. Ki tyllong khubor ki la iathuh ruh ba katei ka jing hiar shuki u bah James Ban kan long ka jingma kaba khraw ia ka ARPA, namar ba la iathuh ba u la dep kren da kaba shai ba u kloi ban hiar shuki ban pynkut ia ka kynrum kynram hapoh ka ARPA, hynrei lada jia ba dang mih biang ki kynrum kynram nangne shakhmat la iathuh ba u bah Ban u la byrngem ba un nym kren eiei shuh hynrei marwei un shong ha ka liang pyrshah.
Ki lad khubor ki la iathuh ba ka jingangnud ba khadduh ubah Ban shuwa ban hiar na ka shuki kaba u shong mynta ka dei ban pynphong Uniform ia ki Daju, bad mynta u la hun ba ki Daju ki la ioh Uniform bad u kwah ban ioih ba ryntih ha ka 1 tarik u nohprah ki daju ki dei ban phong Uniform.