4 tarik U Conrad bad Prestone, kin buh mawnongrim surok Umrit-Umdu

Nongpoh:Ha ka 4 tarik mynta u Bnai, u Conrad K. Sangma, Myntri Rangbah ka sorkar jylla ha ryngkat u Bah Prestone Tynsong, uba dei u Symbud Myntri Rangbah, ki lah ban hiar sha shnong Umrit, ka shnong kaba don ha Ri Bhoi Sepngi bad kaba hap hapoh ka Jirang Constituency.

Katei ka jinghiar jong ki sha katei ka shnong, ka long ban leit buh Mawnongrim na ka bynta ban siangrong bad ban shna pynbha ia ka surok na Umrit sha Umdu, kaba don ia ka jingjngai kumba 31 Km tam ei ei. Ka jingtip kaba malu mala, la iathuh ba ban shna pynbha ia katei ka surok la pynmang pisa haduh T. 51 klur tam.

Lehse lyngba katei ka jingioh ban shna pynbha ia katei ka surok, kan sa long ka jingkyrkhu kaba khraw eh na bynta jong baroh ki paidbah kiba sah ha ki shnong bapher bapher ha Ri Bhoi Sepngi.

Lah ruh ban pynkynmaw hangne, ba ha kine ki bnai kiba la dep haba u Conrad K. Sangma u la leit ban jurip ia ki katto katne tylli ki shnong kiba don ha ka thain Jirang, u la wanphai khnang na katei ka surok sniew bad kaba dap tang ki thliew ki syar suda, ia kaba lehse na katei kaba u mad, kaba la pynlong ia u Conrad K. Sangma ba un pyrkhat kyrpang ia katei ka surok, tad haduh ba dalade u hiar ban buh Mawnongrim ban tei ia katei ka surok.