Shillong, 16 Jylliew:
U Lapbah uba jur u la ther tyngeh ha kine ki saw sngi ba la dep bad ha katei ka jingjur slap ki la don ki jingtwa khyndew kaba shyrkhei bad ki jingkhyllem dieng khyllem siej ha kylleng ki jaka jong ka jylla. Haduh mynta ki lad khubor ki la ioh jingtip ba ki la don haduh 8 ngut kiba la iap na ka jingtwa khyndew, katba ka NDTV kawei na ki lad pathai khubor ha ka ri ka la pyni ba ki la don haduh 12 ngut kiba la iap ha jylla Meghalaya namar ka jingtwa khyndew.
Katkum ka NDTV ka pyni ba 5 ngut ki la iap ha ka jingjia twa khyndew kaba la jia mynta ka step ha ki ar tylli ki jaka, 4 ngut na ki -ki dei na ka juh ka longing bad ka jingjia twa khyndew ka la jia ha ka por ba ki dang ioh thiah lyngngai, katei ka dei kaba la jia ha Nakham Bazaar ha Tura, ki 4 ngut ki dei kiba la tip kyrteng kum Pinky Chetri,( 35 snem), Vijay Chetri, (19), Priya Chetri, (15 ) bad u Rohan Chetri, (11) snem. Katba uwei pat uba la iap mynta hi ka step ka dei ha Akongre, la ong ba utei u la iap na ka daw ka jingshah pom pyrthat, katba 5 ngut kiwei pat ki la mynsaw. La iathuh ba ha kitei ki ar tylli ki jaka ka jingjur slap ka la bteng la kumba ar taiew eiei mynta. Katei ka lad khubor ka la iathuh ba 3 ngut pat ki dei kiba la iap mynhynnin ka miet ha ka jingtwa khyndew ha ki thain ka East Garo Hills, la ong ba kawei ka jingkieng kaba dei ka lynti pdeng ban pyniasoh ia ka South Garo Hills bad kiwei pat ki jaka ka la khyllem bad ki paidbah katei ka thain kim lait shuh ban jam sha kiwei pat ki bynta jong kiwei ki District. Ha ka 13 tarik u jylliew, ka la don ka jingjur slap kaba jur ha ri Lum Jaintia bad ka la don ka jingtwa khyndew kaba jur kaba la ktah ruh ia ka surok bah National Highway 44, ha katei ka jingtwa khyndew ha Ri Lum Jaintia 4 ngut ki la iap bad ar ngut ki la mynsaw, katba da ki hajar tylli ki kali pat ki sahkut hapdeng surok namar ba ka la twa ka la khang lynti ha surok bah. Katba ki lad khubor ha ka jylla ki la pyntip ba haduh mynta ki don 8 ngut kiba la iap na ka jingtwa khyndew ha ka jingjur slap, ha kaba la ong ba 3 ngut ha East Khasi Hills bad 4 ngut ha East Jaintia Hills, bad uwei pat ha South West Garo Hills.
Nalor ka jylla Meghalaya la ong ba ha Assam ruh ka la don ka jingjur slap bad kiba bun ki jaka ki la shlei um mam khamtam ka wah Brahmaputra bad ka wah Jia Bharali ka la shlei mam. La iathuh ba katei ka jingshlei um ka la ktah ia ki 11 tylli ki distrik ka Assam kaba da ki lak ngut ki paidbah ki don hapdeng ka khim khait mynta naba ka rep ka riang ka riang jong ki ka la julor lut bad ka ing sah jong ki ka la dap um, la ong ba kaba shah ktah eh ka dei ha Goalpara Distrik. La ong ba la thaw haduh 10 tylli ki jaka ai jingiarap ha kylleng ki distrik ka Assam bad 7 tylli na ki ki dei tang ha Goalpara Distrik bad ha katei ka jaka ai jingiarap ki don kumba 1700 ngut ki briew, iathuh kawei ka lad khubor, kaba la ong ruh ba kumba 9000 hektar ka jaka rep kaba la shah pynjulor.
Phi don ban ong eiei?